NHM-in cheng nuai 5784 a hmu tawh ; Thla 9 chhungin nausen thi 263 an awm
Mizoram sorkarin National Health Mission (NHM) hnuaiah kum 2017-18 chhungin cheng nuai 5784 a hmu tawh. Hetih lai hian, sorkar kum liam ta, 2017-18 chhunga April-December 2018 chhungin nausen kum khat hnuai lam 263 an thi a, nu nau chunga thi 12 an awm bawk.
Mizoram Assembly budget session neih zawh takah March 28-a Dr K Beichhua zawhna Health minister Lal Thanzara'n a chhan danin, Mizoram sorkarin NHM hnuaiah sorkar laipui aṭangin cheng nuai 5784 a dawng tawh a, chung zinga nuai 5347.11 chu hman tawh a ni.
Hetih lai hian, TT Zothansanga zawhna Health Minister-in a chhannaah, Mizoram sorkar hian NHM hnuaiah kum 2014-15 chhung khan cheng nuai 7113 a dawng a, kum 2015-16 chhungin cheng nuai 6180 leh kum 2016-17 chhungin cheng nuai 4779 a dawng bawk.
Kum 2017-18 chhunga Mizoram sorkarin NHM hnuaia sorkar laipui aṭanga sum a hmuh tawh dan chu - RCH Flexible Pool aṭangin nuai 1300, HSS Mission Flexible Pool aṭangin nuai 2706, NUHM aṭangin nuai 197 te, communicable disease programme hnuaiah cheng nuai 834, non-communicable disease hnuaiah cheng nuai 531 a ni a, a vaiin nuai 5784 a ni.
Communicable disease (natna inkai chhâwn theih) programme chi hrang hranga sum hmuh dan chu - NVBDCP aṭangin nuai 558, RNTCP aṭangin nuai 358, NLEP aṭangin nuai 31 leh IDSP aṭangin nuai 103 a ni. Non-communicable disease (natna inkai chhâwn theih loh) programme hrang hranga sum hmuh dan chu - NPCDCS aṭangin nuai 128.68, NTCP aṭangin nuai 121.97, NPHCE aṭangin nuai 42.64, NPCB aṭangin nuai 140.65 leh NMHP aṭangin nuai 97.06-te a ni bawk.
Sum hmuh tawhte hmannate chu - RCH Flexible Pool-ah nuai 1907.14, HSS Mission Flexible Pool-ah nuai 1965, NUHM-ah nuai 317, communicable disease programme hrang hrangah nuai 858.33 leh non-communicable disease-ah nuai 299.64 a ni a; a vaiin nuai 5347.11 a ni.
Kum 2017-18 chhunga communicable disease programme hrang hranga sum hman dan chu - NVBDCP-ah nuai 509.22, RNTCP-ah nuai 235, NLEP-ah nuai 29.86 leh IDSP-ah nuai 84.25 a ni a; non-communicable disease programme hrang hranga sum hman tawh dan chu - NPCDCS-ah nuai 93.24, NTCP-ah nuai 83.35, NPHCE-ah nuai 29.38, NPCB-ah nuai 46.57 leh NMHP-ah nuai 47.10-te a ni.
Sorkar kum liam taa quarter thum, April-December 2017 chhung khan nausen kum khat hnuai lam 263 an thi a, infant mortality rate (IMR) chu 22 (nausên 1,000 zelah pakhat an thi) a ni a; raicheha nu thi zat chu 12 niin, maternal mortality rate (MMR) chu 101 (nu nau pai 1,00,000 zelah pakhat a thi tihna) a ni thung.
Nausen kum khat hnuai lam thi tamna ber district chu Aizawl West niin, nausen 63 an thi a; chutih laiin, IMR sânna ber chu Aizawl East district-a IMR chu 33 a ni. Nu nau chunga thi tamna ber district chu Champhai district niin, nu panga an thi a, Champhai district hi MMR sanna ber (337) a ni nghal bawk. Hetih lai hian, Kolasib, Lawngtlai, Mamit leh Serchhip district-ahte chuan nu nau chunga thi an awm lo.
Nu nau chunga thite zinga pahnih chu thi pût vanga thi an ni a, pakhat thih chhan chu severe hypertension tih a ni. Chutih laiin, nu nau chunga thi 12 zinga a tam zawk (pakua)-te thih chhan chu sawi chian a ni lo thung.