KHAWTHLIR

Thisen pe
Khawzawl College NSS chuan nimin khan blood donation camp an huaihawt a, Champhai District Hospital tan thisen unit 16 an pe.

LADC budget
Lai Autonomous District Council )LADC) budget session, March 29, 2018-a ṭan chu April 4, 2018 khan zawh a ni. Session-ah hian chief executive member T Zakunga'n kum 2018-19 atana LADC budget Rs. 1,47,94,70,000 a pharh a, lungrual taka pawm a ni.

Artistes Award
North East Zone Cultural Centre (NEZCC) hnuaia Scheme of Recognition to Young Talented Artistes Award 2017-18 hnuaiah folk music/folk song, folk dance, theatre, creative arts/visual arts leh handicratf-ahte thiamna bik nei ṭhalai kum 18-30 inkarte tan dil theih a ni a, award hian Rs. 10,000 a keng. Art & Culture directorate-ah zawhfiah theih a ni a, May 15, 2018 aia tlai loah thehluh tur a ni.

PMMVY zirtir
Nimin khan Mamit IPR conference hall-ah Zawlnuam ICDS hnuaia anganwadi worker-te tan sensitazation training buatsaih a ni a, Mamit additional DC Jacob Lalawmpuia'n a hmanpui. Training-ah hian Pradhan Mantri Matru Vandana Yojana (PMMVY) chungchang inzirtir a ni. PMMVY hnuaia hian Mamit district chhungah nu nau pai 126-te ṭanpuina pek a ni tawh.

Lungphùm phúm
Chief minister Lal Thanhawla chuan nimin khan Odisha for Christ pawl hmalakna, Hermon English School, G.Udayagiri, Odisha-a mi sakna tur lungphùm a phúm. Lal Thanhawla hian Odisha for Christ pawl hmalakna zelna atan ṭanpuina Rs. 8,50,000 a thawh a ni.

Army pre-training
Assam Rifles Inspector General (East) hnuaia 46 Assam Rifles Ex-23 Sector 'B' Coy chuan COB Mimbungah Nilaini khan Mizo ṭhalai sipaia luh tumte tan pre recruitment training an buatsaih a, an ralthuam hrang hrang an pho chhuak nghal. Recruitment training-ah hian ṭhalai 40 an tel a, Mimbung English school zirtirtute leh zirlaite pawhin telpuiin, chhimtu mi 240 vel an awm a ni.