Damdawi-ina solar power plant siamṭhat phût
MNF party ṭhalaite chuan an vice president Lalremruata Chhangte hoin nimin khan Falkawna State Referral Hospital an tlawh a, damdawi-ina solar power plant, hun rei tak hman theih loha awm tawh nia sawi an enfiah. Solar power plant hman theih loha awm mek chu a rang thei ang bera siamṭha turin sorkar an phût.
MNYF tarlan danin, sorkar laipuia Ministry of New & Renewable Energy-in kum 2012 khan India rama damdawi-in 21 tan nizung chakna (solar energy) hmanga kawlphetha siam chhuah theihna solar power plant bunna tur a tifel a; chumi ang chuan, Mizorama damdawi-in panga - State Referral Hospital, Serchhip District Hospital, Lawngtlai District Hospital, Champhai District Hospital leh Mamit District Hospital Hospital-ah solar power plant 100 KwP bun vek a ni.
Damdawi in pakhata solar power plant dinna senso chu cheng nuai 120 ṭheuh niin, a vaiin cheng nuai 600 man a ni a, Mizoram sorkarin state matching share cheng nuai 60 a tum ve bawk.
MNYF vice president Lalremruata Chhangte chuan, Mizorama damdawi-in pangaa solar power plant-te chu tunah hian an hmang thei lo vek niin a sawi a, "Sum tam tak sên ralna hman theih loha a awm hi damlo leh damdawi-ina thawkte Mizoram sorkarin a ngaih pawimawh tâwk lohzia a lang chiang hle a, a rang thei ang bera siamṭha turin sorkar kan phût a ni," a ti.
MNF ṭhalaite chuan, cheng vbc. 40 senga MNF sorkar laia bul ṭan State Referral Hospital chu Congress sokarin tipuitling tura a thuam ṭha chho zel chu lawmawm an tih thu sawiin, "Medical college din tura Mizoram sorkar hmalakna hi ṭha kan tiin kan thlawp a, a hlawhtlin ngei pawh kan beisei," an ti a; chutih rualin, Chief Minister-te unauin politics thila inbeih nan State Referral Hospital chu an hmang ṭhin nia sawiin, "Kum 1999-ah State Referral Hospital din a ni a, NEIGRIHMS chu kum 1987-a din a ni thung," an ti bawk.