Social media-in Mizo hnam a tichhe mek - John Rotluangliana

Minister John Rotluangliana chuan, social media-in Mizo hnam a tichhe mek niin a sawi a, "Thil hre hmasa nih kan duh luatnate hi hlâwkna a awm lo a, ṭawngkam kan duhtui lo ṭhin leh social media kaltlanga indeusawh kan chíng thin hi sim a hun tawh a ni," a ti.

John Rotluangliana hian nimina Rawpuichhip com­munity hall-a YMA Sub-Hqrs, Mamit Conference vawi 6-na a hmanpuinaah thu sawiin, "Tourism a ṭhang zel angin kan rilru pawh kan tihzau ve a ṭul. Tourist chi hrang hrang, hnam hrang hrang, sap, vai leh local tourist kan nei zel dawn a, kan rilru puthmang kan tihzauh a ngai," a ti a; khualzinte hîp turin hawihhâwm a ngaih thu a sawi.

Vai huap chu ram leh hnam humhalhna a ni ngawt lo tih sawiin Rotluangliana chuan, "Nationalism chu keimahni hnam kan chawisan hi a ni. Ram leh hnam humhalhna turin ṭhalaite, a bik takin mipa kan ṭan lehzual a ngai," a ti a, tlangval ṭhalaite chu nulate tan pasala neih tlak an ni em tih inzâwt turin a chah. Zirna kawnga ṭan lak a ngaih thu sawiin, UPSC leh Staff Selection Commission (SSC)-ahte ṭan la thar turin ṭhalaite a fuih bawk.

John Rotluangliana chuan, YMA thupui 'Ram leh hnam humhalh' chu a taka nunpuitu ni turin taimakna, rinawmna leh thawhrimna a ngaih thu a sawi a, "Ṭhalaite'n kan hawiher leh nunphung kan thlak danglam ngam a ṭul a, kan chhungkaw tan eng nge ka tih ve theih tih inzawh a ṭul. Kan ramah HIV hrikpai an tam a, mipat hmeichhiatna hman sual kawngah ṭhalaite an fimkhur a ngai tak zet a ni," a ti.

Mamit sub-headquarters YMA Conference-ah hian palai riak lut mi 465 leh lehlânga kal mi 235 an awm a; sub-headquarters YMA hruaitu tur an thlang a ni.