Sik leh sá inthlak dan zirho

Mizoram Science Technology and Innova­tion Council (MISTIC) hnuaia State Climate Change Cell chuan nimin khan Secretariat conference hall-ah sik leh sá inthlak dan zirhona hun an buatsaih.

Zirhonaah hian State Action Plan on Climate Change (SAPCC) en­nawn­na tura pawimawh lehkhabu, ‘Climate Profile of Mizoram’ tih tlangzarh a ni a; tuihna pawimawhna te, sik leh sá inthlak danglam thut vanga lo neih dan danglam dante leh, chhiatrupna (disaster) a thlen theih dante zirho a ni.

Scientific officer Dr James Lalnunzira tarlan danin, Mizoramah ruahtui tla zat kum tin milimetre 5.22-in a tlahniam a, ruahtui tlak tam ber kum 2007-ah ruahtui mm. 3,121.86 a tlak laiin, kum 2014-ah chuan ruahtui mm. 1,936.83 chiah a tla thung. Lunglei district-ah mm. 3,204.73 tlain, ruahtui tlak tamna ber district a ni a, a tlak tlemna ber district Champhai district-ah mm. 1,534.6 a tla a ni.