Mizoram Economic Conclave neih a ni ; Economy hmasawnna sorkarah a innghat - CM

Ei leh bara Mizoramin hma a sawn theihna tura kawng hrang hranga sorkar, mimal leh pawl anga mawhphurhna fawng vuantute intawhkhawmna, Mizo­ram Economic Conclave chu nimin khan Assembly Annexe-ah buatsaih a ni a, chief minister Lal Thanhawla'n a hawng. CM Hawla chuan, economy hmasawnna sorkarah a innghah thu a sawi.

Chief Minister chuan, ram ei leh bar, economy hmasawnna chu thui takin sorkar ṭhaah a innghah thu sawiin, "Tun dinhmunah state dangte leh India ram pum huap pawhin Mizoram chu GSDP leh per capita income-ahte a ṭhang chak pawl leh a sang pawl a ni chho ta zel hian sorkarah thawktu ṭha leh ṭhahnemngai tam tak an awm zia a tilang a ni," a ti.

Lal Thanhawla chuan, con­clave chu ramin hma a sawn theih nana mi ṭhahnemngai kalkhawmte'n an ngaihdan inhrilhtawn a, an sawihona hun a nih angin ram tam hlâwk hle tura a beisei thu sawiin, "Sorkar hna piah lamah, private sector-ah pawh Mizoramin hmasawn theihna tam tak a neihzia puanzar a ṭul," a ti a; tun hnaiah state páwnah Magnetic Mizoram Roadshow buatsaih a nih thu a sawi.

Mizoram economy ṭhan dan chu lawmawm viau mah se, hmasawnna hna thawh tak tak dawnin sum ngainatna avangin harsatna lian an tawh ṭhin thu sawiin CM Hawla chuan, "Sorkar hmalakna lian tham, kawng siam leh rel kawng siam hnate tiṭhuan­awp ṭhintu chu compensation a ni. Ram hmasawnna thangduang tur chuan muanna a pawimawh a, ram leh hnam hmangaihna kan lan chhuahtir dan hi a huau huau zawng ni loin, thui leh fing taka ngaihtuah a ṭul," a ti.

Finance minister Lalsawta chuan, sorkar department aṭang leh mi taima leh a ngaihna hriate ram economy ṭhan theih nan an ngaihdante thawha sawiho tura an kalkhawm chu lawmawm a tih thu sawiin, "NEDP hnuaia entrepreneurship tihhmasawnna kalpui mekah mi tum ruh tlat, sorkar tana thawhpui nuam tak an awm," a ti a; entrepreneurship chuan Mizoram economy-ah zawi zawiin nghawng ṭha a nei chhoh zel thu a sawi.

Finance Minister chuan, state economy a ziaawm chhoh tih sawiin, "Tunah chuan Mizo­ram chu ei ṭâwk ṭâwk (sub­sistence economy) ni loin, market economy-a siam turin sorkarin hma a la mek a, chumi tur chuan sorkarin mi remhria leh taimate puiha remchanna siamsak lam a thawk ang. Mipui lamin eizawnna kawng ṭha leh tluantling tur an ngaihtuahin an dap ve thung dawn a ni," a ti.

Mizoram Economic Conclave hi chhawng thuma kalpui a ni a, a hawnna inkhawm leh technical session pahnih awmin, State Planning Board expert member Prof. Lianzela leh Prof. Vanlalchhawna ten technical session an kaihruai.

Planning Board expert member Dr James LT Thanga hoin agriculture leh a kaihhnawih eizawnna kawngin Mizoram hmasawnna atan an thawh leh hmalak zel dan turte sawiho a ni a; MEDMOC expert mem­­­ber Dr Laldinliana Varte hoin entrepreneurship lama hmasanna sawiho a ni bawk.