Hnam chhan turin sorkar huaisen kan mamawh - F Lalremsiama, IPS (Rtd.)

Ṭangrual pawl, Zoram People’s Movement (ZPM) Val Upa Council (VUC) vice chairman F Lalremsiama chuan, "Hnam chhan turin kan huaisen a ngai. MZP zui ngam sorkar Mizoramin a mamawh" a ti.

Nimina ZPM pisaa inkhawmah thu sawiin F Lalremsiama chuan, "Zophai chungchang mai loah pawh, hnam damna kan tuipui loh a, kan thawk duh lo a nih chuan a pawi ngawt ang," a ti a; Mizo hnam a dama a din chhuah a pawimawh thu a sawi.

ZPM VUC Vice Chairman chuan, sorkara MLA-te chu lak luh an nih tirha an thutiamah an ding ṭhin lo nia sawiin, "Anmahni flagship programme, sorkar pawisa hmanga tihhlawhtlin an tum NLUP-ah pawh thlei bik neiin ro an rel a ni. Keini chu kan sorkar ve phawt chuan ‘Kei kei, ti loin, nang nang’ tiin kalphung thar, mirethei, mi hnuaihnung dâwm kâng tur sorkar, Mizo hnam damna thupui bera neih ngam sorkar din kan tum ang," a ti.

ZPM inkhawm hi Liankhuma Hrahsel, ZPM general secretary (Vigi­lance)-in a kaihruai a, fuihna thu sawitu ZPM secretary general K Sapdanga chuan, ZPM-a tel political party-te chu party mal office leh programme kalsana Tangrual Pawl programme an ngaih pawimawh zawk hunah mipui rin an hlawh chauh dawn tih a sawi. Sorkar tha din duh pawl hrang hrangte ZPM-ah an thawkho deuh vek tawh tih sawiin, a la bang chhun PRISM pawh ziakin vawi hnih ngawt an sawm tawh a, an inpeih thuai a beisei tih a sawi bawk.