Hmeichhiate'n mipate thawh ang thawh An inhuam a pawimawh - Vanlalawmpuii

Nimin khan Kolasib College-ah 'Gender Sensitization Programme' buatsaih a ni a; khuallian, minister of state Vanlalawmpuii Chawngthu chuan, hmeichhiate'n mipate thawh ang thawh ve an inhuam a pawimawh thu a sawi.

Vanlalawmpuii Chawngthu chuan, politics-ah emaw, sorkarah emaw hna lian thawk turin hmei­chhiate an tumruh leh zual a ngaih thu a sawi a, "Mipate thawh angte thawk ve tura inhuam a pawimawh. Minister, MLA, officer-te hi a nihna ringawt ni loin, ram leh hnam tan tih tak zeta hna thawh a pawimawh. Tluk palh a awm thei a, heng hunahte hian beidawng loa tho chhuakin, hmalam pan zel a ṭul," a ti.

Hmeichhiate'n an pasalte an zahin an chawimawi tur a ni tih sawiin Vanlalawmpuii chuan, "Tun­lai khawvel kal chhoah mipa leh hmeichhiate chu tharum ni loin, thiamna leh finnaahte an inel tawh a, hmeichhiate'n hma an sawnin an changkang tawh," a ti a; hna zawnaah pawh mipate'n hmeichhia an phak loh ṭan mek avangin mipate'n ṭan an lak a ṭul thu a sawi.

Zirlaite fuihna thu sawiin Awmpuii chuan, "Kan ngaihsan zawngte kan thlak a hun tawh. Mimal, a bik takin sorkar hnathawk officer ṭhenkhatte chu pawl hrang hranga sum an thawh hnem vanga ngaihsan ringawt te, in leh lo ropui tak tak neite chu ngaihsan nghal ringawt chi a ni lo a, khawia pawisa nge an thawh a, khawia pawisain nge in leh lo an din tihte ngaituah hmasak a ṭul," a ti.

Inkhawmah hian Mizoram University-a professor Lalneih­zovi'n hmeichhia leh mipa inkara inthliarna chi hrang hrang awm thei leh a kaihhnawih chungchang a sawi a; Aizawl Theological College-a professor T Vanlaltlani'n Mizo chhungkua, khawtlang leh ram inrelbawlna kawnga Mizo hmeichhiate chawisan chungchang a sawi thung.