KHAWTHLIR
Eng awm dawn lo
Power & Electricity department chuan vawiin hian zing dar 9 aṭanga tlai dar 5 thleng Luangmual Sub-Station-ah hna an thawh dawn avangin, Luangmual Sub-Station-in a chawm ṭhenkhatte'n vawiinah kawlphetha an nei thei dawn lo tih an tarlang.ṭ
Zirtirtu training
School Education department chuan nimin khan Saikuti Hall-ah Lunglei district chhunga zirtirtu mi 200 chuangte tan Measles Rubella Vaccination Campaign an buatsaih. Measles-Rubella Vaccination Campaign hmalaknaa zirtirtute hriat tur pawimawh leh an mawhphurnate hrilhfiah an ni.
SSA sum
Kum 2012-2018 chhung khan Mizoram SSA chuan sorkar laipui aṭangin cheng nuai 76,291.99 an hmu a; sum an hmuh dan chu - kum 2012-13 chhungin nuai 17,009.22, kum 2013-14 ah nuai 11,928.69, kum 2014-15 ah nuai 15,957.94, kum 2015-16 ah nuai 12,510.09 leh, kum 2017-18-ah nuai 7904.81 a ni.
Doctor 304
Assembly Session neih zawh takah INC member TT Zothansanga zawhna ziaka chhangin Healhth & Family Welfare minister Lal Thanzara chuan Mizoram sorkar damdawi-ina thawk lai doctor 304 an awm thu a tarlang.
Tripura-ah Sawta
April 10 hian Agartala, Tripura-ah NITI Forum for North East Meeting neih tur a ni dawn a, Finance minister Lalsawta pawh a tel ang. Finance Minister hi Planning secretary Dr. C Vanlalramsanga'n a ṭawiawm dawn a ni.
Ex-Service khawmpui
Mizoram Ex-Service Leaque (MESL), Champhai Sub-Headquarters chuan nimin khan Champhai Venglai community hall-ah khawmpui an hmang a, an hun hmanpuitu Champhai North bialtu MLA TT Zothansanga chuan ram leh hnamin zalenna a neih theihna tura pawimawh tak chu sipaite an nih thu a sawi. MESL Champhai Sub-Hqrs hi June14, 1996 khan din a ni a, tun dinhmunah an hnuaiah unit pariat a awm.