Ruihtheihthil leh vaihlo do dan tur sawiho

Project HIMNA-MADAT (Mizoram Against Drugs, Alcohol & Tobacco) member-te chu nimin khan Aizawl bawrhsap Dr A Muthamma hoin DC conference hall-ah an ṭhukhawm a; ruih theih thil leh vaihlo do kawnga hmalak dan tur an sawiho.

Aizawl Bawrhsap chuan, drug, vaihhlo leh zu hman sualna kawngah Mizote an sân thu sawiin, "Heng thil pathum hman khawlohnain a thlen buainate chinfel dan ṭha­hnemngai taka kan ngaihtuah a, hma kan lak a hun tak zet. Heng buainate chinfel kawngah supply lam leh demand lam a awm a, supply lamah chuan kan NGO-te, a bik takin YMA-in ṭan an la nasa a, an fakawm hle. Demand lam, drug leh vaihlo hmang sualtuteah hian ṭan lak a ngai a ni," a ti.

HIMNA-MADAT chungchang sawizautu Dr Vanlalhruaii, IASE principal chuan, Mizoram chu Kristian tamna ram a nih angin, kohhran lamin hma an lak chuan hlawhtlinna tam tak hmuh theih a beiseiawm thu a sawi.

Project HIMNA-MADAT hi NEDP hnuai­a Aizawl DC Pilot Project niin, ruiht­heihthil laka ṭhalaite an fihlim theihna tura ruahmanna a ni a; a enchhin nan Aizawl district-a sikul 50-ah kalpui mek a ni.

HIMNA-MADAT hnuaia Research and Documentation Sub-Committee chuan ruih theih thil laka beihpui thlakna tura zir chian­na an neihnaah, sikul naupang an zir chian zinga 53% chuan ruih theih thil ti ṭhian an nei a; 85.8% chuan an chhungkaw zingah ruihhlo hmang an awm a, an ṭhiante chu ruihhlo ti tura kawhhmuhtu an ni tlangpui. Vaihhlo leh zu chu zirlaite'n an khawih nasat pawl a ni a, ruihhlo khawih tur a awm chuan ti thei mai zirlai zingah an tam.

Project HIMNA-MADAT Coordination and Implementation Committee chu February 27, 2018 khan din a ni tawh a, Aizawl DC chu chairman a ni. Research and Documentation Sub-Committee chu April 19, 2017-ah din a ni a, IASE principal Dr Vanlalhruaii chu chairman a ni.