Pulpit-a BJP chungchang sawi ṭhin hi BJP tan a lawmawm zawk - Dr. JV Hluna

BJP, Mizoram Pradesh chuan nimin khan an pisaah Mizorama BJP din champha, Foundation Day an lawm a; Mizoram BJP president Prof. JV Hluna'n thu sawiin, kohhran hruaitute'n pulpit aṭanga BJP chungchang an sawi ṭhin chu an tan a lawmawm zawk niin a sawi.

Prof. JV Hluna chuan, Mizoramah BJP chu Hindu pawl, Kristiante nêkchêptu, bawng talh khaptu, anti-convertion law siamtu anga sawi ṭhin a nih thu sawiin, "He thu hi kohhran hruaitu, Pu Hawla dawisa ei ṭhenkhatte'n an sawi nasa zual. Kohhran inkhawmpui lian tak taka BJP hming lam rik emaw, a hming sawi chiah lo pawhin a chhinchhiahna rawng tal sawitute'n party dang chhinchhiahna Makali kutphah leh party dang hming sawi loa BJP chungchang pulpit-a an sawi lan avangin lawmthu ka sawi a ni," a ti.

BJP President chuan, pulpit-ah BJP sawi lan a nih fo avangin BJP chanchin hriat chian duh an pun phah nia sawiin, "Pulpit-a sawi duh chuan sawi zui zel se la, BJP hi Zoram Kristiante'n kan hriat chian phahin thu dik kan hriat phah dawn a ni," a ti a; BJP chu a hlauhawm nia sawiin, India rama Congress rorel kum 60 chhung aiin Narendra Modi rorel hnuah Kristian an zalen zawk niin a sawi.

Manipur-a BJP sorkarin Good Friday-ah office kal tura thupek a chhuah chungchangah JV Hluna chuan, "Hei hi Kristiante ngaih pawimawh lohna leh zahlohna lam ni loin, financial year closing vang a ni a, bill pending an ngah lutuk vangin an ti a ni. Mahse, Manipur-a Kristian minister leh MLA-te'n CM leh Governor hmuin, ti lo turin an ngen a, order hi an sût leh a ni," a ti.

Mizoram BJP President chuan, BJP chu Mizoramah April 6, 1980-ah din a nih thu sawiin, an din champha pualin Mizoram mipui chibai a bûk a ni.