Vawk semah induhsakna uchuak awmah ngai

MNF East Block Serchhip hruaitute chuan nimin khan Jamela Hotel, Ser­chhipah thuthar thehdarhtute an kâwm a; NLUP hnuaia vawk note sem danah induhsakna uchhuak tak a awm niin an sawi.

MNF Serchhip East Block president T Zadingliana chuan, Chief Minister hoa ṭhukhawm, State Purchase Advisory Board leh AH&Vety Director-in NLUP-a sem tur vawk note chu tual­chhung vawk note a tam thei ang ber sem an duh thu sawiin, "Serchhip district-a tualchhung vawk note awm zat an rawn zawh angin Serchhip DVO chuan May 23, 2017 khan Serchhip district-ah tual­chhung vawk note 1,622 a awm thu a thawn a, hetih lai hian, Vanlalhmuaka s/o Lalluaua (L), Champhai Zotlang chu vawk note supply tir a ni," a ti.

Serchhipa NLUP hnuaia vawk note sem zinga tam tak an thih thu sawiin T Zadingliana chuan , "AH&Vety department-in Serchhip district-a NLUP vawk note thi zat report a dawn chu 350 a chuang tawh. Serchhip district-ah NLUP hnuaia vawk note dawng tur chhungkaw 458 chu vawk pathum ṭheuh sem tur an ni a, a vaia sem tur 1,374 chu district-a tualchhung vawk note awm zat 1,622-in a daih laia hmun danga mi supply tir a ni hi induhsakna uchuak a ni," an ti a; vawk supply-ah manṭang ei an awma rin theih a nih thu a sawi.

T Zadingliana chuan, NLUP beneficiary-te tana tualchhung vawk note pathum lei phalsak an nih ṭum chuan vawk note thi a awm hriat a nih loh thu a sawi a, "NLUP dawngtute'n an duh lo a nih chuan an vawk note dawn an thleng leh thei ang tih awm pawh NLUP dawngtute'n an hre lo. Hetianga NLUP dawngtute sawisak an ni hi NLUP dawngtute rahbehna leh hmuhsitnaah kan ngai," a ti.