Khawvel khalh kal thei khawp economy ṭha neih theihna ramah kan awm - CM

Chief minister Zoramthanga chuan, khawvel khalh kal thei khawpa economy ṭhat theihna (economy that can move the world) ramah Mizote chu an awm thu a sawi.

Nimina Chanmari-Chaltlang kawng zauh leh kea kalna (footpath) siam thar a hawnnaah thu sawiin Chief Minister chuan, "Pathianin Israel-te leilung malsawmna a pek khu cheng 10 hû ni se, Mizoram leilung malsawmna a pek chu cheng 100 hû a ni ang; kan la hâi chhuak lo mai mai a ni. Ram ruak ni se, Israel mipuiin rawn luah thut mai se, nuam an tiin an hausa ngawt ang," a ti.

CM Zoramthanga chuan, Mizoram tana Pathianin malsawmna a pek hâi chhuah loh a la tam thu sawiin, "Pathianin malsawmna min pek hi a rei telh telh ang a, a ropuizia leh manhlazia kan hre telh telh ang. Chu chona chu kan hmaah a awm a, chu chu ka buaipui ber a ni," a ti a; hripui a reh chuan Pathianin malsawmna a pekte hâi chhuah chu an hmabak tur a nih thu a sawi.

Zoramthanga chuan Aizawla lei verh chungchangah 'A harsat sat nen' ti an awm thu a sawi a, "Rél kawng tur an verh a, an awlsam khawp, an verh zung zung. Tuifinriat hnuaiah pawh an verh," a ti.

NHIDCL-in tuna rilrua an neih chu - Aizawl by-pass road atan Sairang aṭanga Maumual lama kal loin, Bawngkawn Brigade hnuaiah kal se tih a nih thu sawiin CM Zorama chuan, "Bawngkawn hnuaiah verh tlang ila tih a awm," a ti a; Bawngkawn hnuai Chitea verh tlang ni tho mah se, tuna NHIDCL rilru-a awm chu Bawngkawn aṭanga Zuangtui hnuai deuha verh tlang a nih thu a sawi.

Zoramthanga chuan, Bawngkawn aṭanga Zuangtui hnuaia verh tlang aṭang hian Muthi lamah kalin, Seling dep mual pawm vêtin, Tuirial Airfield thlanga lei dawh chu NHIDCL rilrua awm a nih thu sawiin, "Chutiang a nih chuan Seling km. 40 khi km. 25 velin a hnai thei an ti. Chu project chu NHIDCL-in an en mek a ni. He lamah pawh verh ila, he lamah pawh verh ila, an huphurh tawh lo reng reng," a ti.

Ropeway chungchang sawiin Zorama chuan, "Project awm mek chu Zemabawk aṭanga Bara Bazar lam phei mai a, kual vak ngai tawh loin," a ti a, project chi hrang hrang an siam zung zung niin a sawi.

Chief Minister chuan, AMC din chu a tìrah chuan mi eng emaw zat an awm ang a, pawisa a hek mai mai ti an awm thu sawiin, "Lunglei lama kan din tumah pawh ni 100 inhlawhna chân hlaute an awm. Ṭha lo ni se khawpui dangah an ti duh lo ang. AMC hi a rei tulh tulh a, ṭha kan ti tulh tulh," a ti.

AMC mayor Lal­rinenga Sailo pawhin thu sawiin, Chanmari-Chaltlang kawng chu Aizawl khawpui tan kawng pawimawh tak a nih thu a sawi a, "Tun hma chuan kawng hlauhawm tak a ni ṭhin. Sorkarin footpath a lo siam tawh a, hun kal zelah a lo hlui a, kawngte a zîm tawh a ni," tiin, a pawimawhna hriain AMC-in project siama hma an lak thu a sawi.

Technical report petu AMC executive engineer Zohmingthanga tarlan danin, Chanmari-Chaltlang kawngah hian a tirah chuan cheng nuai 100 sêngin footpath siam tum a ni a; hna thawh a nih hnuah ruahmanna thlâkin, cheng nuai 300.30 sengin kawngpui zauh leh footpath siam hna thawh tura thlak a ni.

January 25, 2019-ah hna thawh ṭan a ni a, ruahmanna thlâk leh chhan hrang hrang vanga hna a khaihlak hnuah March 15, 2021-ah siam zawh a ni. Kawng zauh leh footpath siam chin chu metre 253 a ni a, zauh a nih hmaa kawngpui zau zawng chawhrual chu metre 5.2 niin, zauh a nih hnuah metre 8 a ni.