ZMC-ah oxygen plant thar hawng

Mizoram sorkarin PM CARES aṭanga a dawn oxygen plant 300 LPM chu nimin khan Health minister Dr R Lalthang­liana'n Zoram Medical College (ZMC)-ah a hawng. Minister chuan, district hospital tinah oxygen plant dah tum a nih thu a sawi.

Oxygen plant 300 LPM hian minute khatah oxygen litre 300 a siam chhuak thei a, darkar 24 chhungin litre 4,32,000 a pe chhuak thei a ni.

Dr R Lalthangliana chuan, ZMC-in oxygen plant 200 LPM a neih sa bakah, 300 LPM a neih belh chu a lawm thu sawiin, "Tunah hian PM CARES hnuaia kan dawn tho CPWD-in an rawn bun 1,000 LPM pawh rei lo têah kan hawng thei tawh dawn a, oxygen-ah chuan a thlamuanthlak hle," a ti.

Mizorama district hospital tinah oxygen plant dah tura ruahman a nih thu sawiin Minister chuan, "Tunah hian Kola­sib-a mi tur 250 LPM leh Mamita mi tur 500 LPM chu Lengpui Airport-ah a thleng tawh a, a rih tham avangin crane hmanga lak sawn a ngai a, ISPAT-te'n hma min laksak dawn," a ti a; Synod Hospital leh Christian Hospital, Serkawna oxygen plant tur pawh CSR kaltlanga hmuh theih dan dap mek a nih thu leh NESIDS aṭangin ZMC-ah mipa leh hmeichhe hostel sakna tur cheng nuai 1,000 an dawn dawn thu a sawi bawk.

Health Minister sawi danin, ZMC-a oxygen plant bun thar 300 LPM hi PM CARES Fund hnuaiah June 18, 2021 khan Health Ministry aṭanga dawn a ni a, a khawl dahna tur in chu cheng nuai 21 séngin Mizoram sorkarin chawlhkar thum chhungin a sa zo. Oxygen plant hi Central Medical Services Society-in a thlawnin an bun a, July 27, 2021 khan bun zawh a ni.

Mizoramah Covid-19 vei damlo zingah na tak tak an tam avangin oxygen an mamawh zat a sang a, ZMC-in ni khatah oxygen litre nuai 12-13 vel a mamawh. ZMC-in khawl a neih sa 200 LPM hmanga siam chhuah bakah, oxygen dang leina atan ni khatah Rs. 45,000 vel (thla khatah Rs. 13,50,000 vel) hman ṭhin a ni.