Kuthnathawktute aia kharchhawng an hlawk Sorkar chuan ṭha a ti lo - Agriculture Minister

Agriculture minister C Lalrinsanga chuan, kut hnathawk­tute aia khârchhâwngte an hlâwk zawk ṭhin chu sorkarin ṭha a tih loh thu sawiin, "Hei hi tihreh tumin hma kan la," a ti.

Lungleng-I khuain Vawkzawn­parh chuan hnuai rama lo zawh rûnpui an buatsaih a hmanpuinaah Agriculture Minister chuan, "Theihtawp chhuaha thlan tui nena hna thawktu kut hnathawktute aia thlan pawh tla loa khârchhâwngte an hlâwk zawk ṭhin hi sorkar chuan ṭha a ti lo," a ti a; kut hnathawktute'n an chanvo dik tak an chan theihna turin hma an lak thu a sawi.

C Lalrinsanga chuan, kut hnathawktute'n an thar chhuah hralhna an neih reng theih nan cold storage nen inchhawp an tum thu sawiin, "Sorkarin kut hnathawktute tan theihtawp kan chhuah. Kut hnathawktute pawhin ṭan lo la zel rawh u," a ti.

Lo zawhnaah hian bialtu MLA Prof. F Lalnunmawia, Dr ZR Thiamsanga, MLA leh chief secretary Lalnunmawia Chuaungo te pawh an tel a ni.