ZPM hi sorkar tura mipui rin ber a ni - Lalduhoma

ZPM leader Lalduhoma chuan, ZPM chu sorkar mai tura mipui rin ber a nia sawiin, party dangte'n dawt nen bei mah se, lungrual takin hma lam an pan mek zel niin a sawi.

Lalduhoma hian September 16, Ningani tlai leh zana Lungsen leh Chhûmkhûm khuaa an party zawm tharte a lawm luhnaah thu sawiin, "ZPM hi sorkar mai tura mipui rin ber a nih avangin party dangte'n tihchhiat tumin dâwt nen min bei mah se, kan thawhhona leh lungrualna a ṭha em em a, lungrual takin hma lam kan pan mek. Kan party hming Zoram People's Movement tih a nih angin, Zorama hnam hrang hrang lenna party kan ni," a ti.

Mahni party policy tihlawhtling lote rinawm taka zui zel chu mipuiin an ba lo tih sawiin Duhoma chuan, "ZPM chuan policy-a rinawm leh ngheh kan ngai pawimawh ber. Pathian leh mipui zarah hlawhtlinna kan chang a nih chuan Zoram politics-ah Pathian ram a taka a lo thlen theih nan tih tak zetin Pathian ṭihna nen ram rawngbawl hna kan thawk dawn a ni," a ti a; Mizorama party ṭhenkhat chuan party-a rinawm turin an inzirtir tih a sawi.

ZPM Leader chuan, Mizoram state a nih aṭanga tun thlengin sorkarna chang tawhte'n Thorang bial an ngaihthah hle ṭhin tih sawiin, "ZPM kan sorkar chuan he bialin a mamawh em em lui dung kaltlanga inkalpawhna kan ngai pawimawh dawn. Dê lui - Tlabung inkalpawh tiharsatu Zawngêk suar hi chhu chhiain, awlsam taka inkalpawhna siam kan tum a ni," a ti.

Lalduhoma chuan, "ZPM-te'n kan ngaih pawimawh ber chu kut hnathawktute leh ṭhalaite an ni a, hun rei tak kan lo vahvaihpui tawh thlai thar leina leh bána kaih policy hmangin hma kan la dawn a ni," a ti bawk.

ZPM thuchhuah chuan, Lalduhoma hian an party zawm thar Lungsenah mi 172 leh Chhûmkhûmah mi 60 a lawm lut a, chhûn lamah Zawlpui leh Putlungasihah mi 151 a lawm lut bawk niin an tarlang.