Aizawlah vawk leh ar vulh lo turin ngen

Aizawl Municipal Corporation (AMC) mayor Lalrinenga Sailo chuan, Aizawl khawpuia chêngte chu khawpui a thianghlim zawk theih nan khawpui chhungah vawk leh ar vulh tawh lo turin a ngen.

Lalrinenga Sailo hian nimina Chanmari-Chaltlang kawng zauh hawnnaah thu sawiin, Aizawl khawpui tan theihtawp an chhuah zel dawn thu a sawi a, "Ar vulh leh vawk vulh hian khawpui thianghlimna leh hriselna a nghawng avangin tihtawp kan tum. Mipui pawh vawk leh ar vulh tawh lo turin kan inngen lâwk a ni," a ti.

AMC Site Develop­ment and Slope Modifi­cation Regulation an hman ṭan dawn thu sawiin Aizawl Mayor chuan, "Hmang ṭan turin notification kan chhuah ṭep. Hemi hnuaiah hian in sakna tur leh thil dang atana lei laih ngai reng reng chu phalna lak hmasak zel a ngai tawh dawn," a ti a; a him leh him loh pawh ngaihtuah loa duh duhna hmuna lei laih phal a nih tawh dawn loh thu a sawi.