Buhfaia khawthlang harsatna sawiho

Tlabunga VC leh khawtlang huap pawl dangte inzawmkhawmna Tlabung Joint Action Committee hruaitute chuan nimin khan FCSCA minister K Lalrinliana chu a pisaah an kâwm a; Lunglei-Tlabung kawng chhiat lutuk avanga buhfai lama harsatna an tawh mek chungchang an thlen.

Tlabung JAC hruaitute chuan, an khua aṭanga Lunglei panna kawngpui chhiat lutuk avanga buhfai phur ṭhinte'n an tàwpsan hnuah, mipuiin harsatna lian an tawh lohna tura sorkar hmalakna fakawm an tih thu an sawi a; Tlabunga Supply department-in buhfai dah khawlna atana an hman kudam chu buhfai tam zawk dah theihna tura zauh belh a ngai tawha an hriat thu sawiin, hma laksak turin an ngen.

K Lalrinliana chuan, kawng chhiat vanga Tlabung leh a chhehvel mipuiin harsatna an tawh thu a hriat veleh theihtawp chhuahin hma a la nghal tih a sawi a; tun thla chhung atana buhfai an lak tur chu chawlhkar thumnaah a vaia pek chhuah hman tuma hmalak a nih thu te, buhfai phurtute'n phurh man tihsan an ngiat chu a ṭul anga ennawn tum a nih thu te, Tlabunga Supply kudam zauh dan tur ngaihtuah a tum thute a sawi bawk.

Thu dawn danin, Tlabung Supply kudama buhfai awm ang ang chu September thla chhung atan retailer-te hnenah pek chhuah a ni a; retailer 19 zinga a zahve velin mipuia sem turin buhfai an la tawh a ni.