Vety Minister-in ran talhna a tlawh

Animal Husbandry & Veterinary (AH&Vety) minister Dr K Beichhua chuan nimin khan Mualpui leh Bawngkawn Brigade-a ran talhna, slaughter house a tlawh a; district dang pali tan slaughter house sakna tur project siam a nih thu a sawi.

Dr K Beichhua chuan, Aizawl leh district dang pali tan slaughter house sakna tur project siam a nih thu leh saa Mizoram a intodelh theih nan hma an lak thu sawiin, "Covid-19 léng avanga ûm zui kawngah harsatna kan tâwk a, hripui a ziaawm hnuah New Delhi lamah kan ûm zui mek a ni," a ti.

African Swine Fever (ASF)-in Mizoram a luh chilh avangin vawk tam tak a thi tih sawiin Beichhua chuan, "Tam tak suat a ni bawk a, a lungchhiatthlak hle. ASF vangin vawk 27,704 a thi tawh a, 13,000 chuang suat a ni tawh," a ti a; vawk vulhtute zangnadawmna tur sorkar laipuiah an dil mek thu a sawi.

AH&Vety Minister sawi danin, ASF avangin ram dang aṭangin vawk lak luh a rem lo a, mithiamte'n vawk vulh a him tâwka an hriat hunah vulh ṭan leh a rem chauh dawn. Ram dang farm thianghlim aṭanga vawk lak luh dan leh a ṭul anga khung hran hnua mipui vulh theih tura sem dan tur ruahmannate AH&Vety department-in an zir chiang mek a ni.

Aizawla slaughter house-te chu Food Safety and Standard Authority (FSSAI) license nei leh Mizoram Pollution Control Board aṭangin phalna pek a ni. Mualpuia slaughter house chu May 2017-ah hman ṭan niin, ni tin vawk 50 leh bawng 50 talh theihna a ni.

Minister of state Dr K Beichhua hi Agriculture Development Board vice chairman H Biakzaua, MLA-in a ṭawiawm.