Superspeciality Cancer & Research Centre Cheng nuai 500 sênga sak tur hawn a ni

Japan International Coope­ration Agency (JICA) loan hmanga cheng vbc. 500 sênga Mizoram State Superspeciality Cancer and Research Centre (MSSCRC) sak tur chu nimin khan internet kaltlangin hawn a ni. Centre hi kum 2023-ah thawh ṭan beisei a ni a, kum nga chhunga thawh zawh tura ruahman a ni.

Hawnna inkhawmah hian Mizoram sorkar aiawhin Health minister Dr R Lalthangliana, Health secretary R Lalramnghaka, Hospital & Medical Education director Dr T Lalhmangaihi leh MSSCRC project coordinator Dr Jeremy L Pautu te an tel a; JICA aiawhin South Asia Division-I director Takeuchi Takuro, country officer Wakabatashi Kota leh Kato Shinichiro bakah, JICA survey team-te an tel.

Health Minister chuan, JICA-in Mizoram ngai pawimawhin project hlu leh rotling turah hma an lâk thu sawiin, "Cancer-in Mizoram a nghawng nasa hle a, theihtawp kan chhuah chung pawhin kawng hrang hrangah harsatna kan nei. JICA-in ruahmanna leh rawtna fel tak nen ngaihtuahna min sênpui avangin kan lawm tak zet a, project a hlawhtlin theih nan sorkarin theihtawp kan chhuah dawn a ni," a ti.

JICA aiawhte chuan, Mizoramin hriselna kawnga hma a laknaa an tel ve thei chu lawmawm an tih thu sawiin, Mizorama kal an phûr a, mipui nen thawhhona ṭha tak neih an beisei thu an sawi a; kum 2023-ah hna ṭan an inbeisei thu an sawi bawk.

MSSCRC sakna tur hian May 10, 2019-ah project thehluh a ni a, August 14, 2019-ah sorkar laipuia Department of Economic Affairs-in an pawm. Mizoram sorkar leh Public Health Foundation of India (PHFI)-in November 11, 2019-ah DPR siam tura inremna an ziak a, May 7, 2020-ah Mizoram sorkarah DPR kimchang thehluh a ni. Ministry of Health & Family Welfare-in technical appraisal report buatsaih tura a ràwn angin August 31, 2021 khan Health minister Dr R Lalthangliana chuan Union Health Minister hnenah a hlàn a ni.

MSSSCRC sakna tur cheng vbc 500 aṭangin JICA loan cheng vbc. 400 (80%) pûk tur a ni a, Mizoram sorkarin cheng vbc. 100 (20%) a tum ang. Loan hi India President hminga pûk a ni a, hna thawktu tur chu Mizoram sorkar a ni. Kum nga chhunga thawh zawh tura ruahman niin, loan chu kum 30 chhunga rulh zawh tur a ni a, grace period kum 10 dang a la awm thei bawk.