Covid-19 vangin mi 254 thi tawh

Nimin khan Covid-19 vei mi pakhat a thi a, September 16, Ningani zan khan mi pahnih an thi bawk. Sorkar chhinchhiah angin, nimin tlai dar 5 thleng khan Mizoramah hripui vangin mi 254 an thi tawh a, September thla bikah mi 37 an thi tawh.

Covid-19 vei enkawl lai Lalchhanhima Hnamte (39) h/o K Vanlalhruaii, Chanmari, Aizawl chu September 16, Ningani zan dar 9:48 khan State Referral Hospital-ah a thi. Amah hi zunthlum leh pneumonia nei sa, Covid-19 vaccine dose khat la tawh a ni a; Covid-19 vei a ni tih August 21 khan hmuh chhuah niin, August 28 aṭangin SRH-ah enkawl a ni.

September 16 vek zan dar 10:10 khan Lalremkima (30), Kolasib Hmarveng chu hripui vangin SRH-ZMC-ah a thi. Covid-19 positive a ni tih September 8 khan hmuh chhuah a ni a, SRH-ah dah luh nghal a ni. Natna dang nei sa a nih thu Kolasib aṭanga thu dawnna chuan a sawi.

Nimin zing dar 2:10 khan Lalrinhlui (48) d/o Manthanga (L), Darlawn Venghlun pawh Covid-19 vangin SRH-ZMC-ah a thi a, hripui vanga thi 254-na a ni. Covid-19 vei a ni tih August 18 khan hmuh chhuah a ni a, SRH-ah enkawl nghal a nih thu sorkar thuchhuakin a tarlang.