COVID-19: Mizoram dinhmun ; Hripui vei 1,121 hmuh belh a ni

September 16, Ningani khan Mizoramah Covid-19 vei mi 1,121 hmuh chhuah a ni. Tun thlaa ni 16 zingah hripui vei mi sang khat aia tam hmuh chhuah ní ni 10 a awm a, a záwnin ni li chhung mi sang chuang hmuh a ni tawh. Nimin khan Covid-19 vei dam tawh mi 544 chhuahtir an ni a, hripui vanga thi mi pathum an awm belh.

Covid-19 vei Ningania hmuh tharte chu mipa 512 leh hmeichhia 609 an ni a; ZMC laboratory-a hmuh chhuah 247, TrueNAT-PCR hmanga hmuh 85, RAT hmanga hmuh 773 leh Fluorescent Immunoassay (FIA) hmanga hmuh 16 an ni. Mizoram chu hmarchhak state zingah ni 25 chhung a záwnin Covid-19 positive hmuh tam berna state a ni tawh.

IDSP record angin, Mizoramah Covid-19 vei 76,591 hmuh chhuah a ni tawh a, mipa 38,494 leh hmeichhia 38,097 an ni. Nimin tlai dar 5 thleng khan mi 62,993 (82.25%) chhuahtir an ni tawh a, mi 254 (0.33%) thi tawhin, enkawl mek mi 13,344 (17.42%) an awm.

September 16, 2021-a hripui vei hmuh thar mi 1,121-te chu symptom nei 564 leh nei lo 557 an ni a; tualchhunga kái 1,118 leh tun hnaia state pawn aṭanga rawn lut pathum niin, tualchhunga kái zingah kàina chin hriat loh 453 an awm.

Hripui vei hmuh thar mi 1,121 zingah nausên kum khat tling lo 15 an tel a, an zingah symptom nei pali an awm. Thla khat la tling lo pathum an awm a, a naupang ber - ni 5 mi pahnih chu SRH-ZMC-a piang ve ve an ni. Kum 70 chung lam mi 36 awmin, an zinga mi 17-in symptom an nei a, a upa ber chu kum 85 a ni.

September thla ni 16 chhungin hripui vei mi 16,590 hmuh a ni tawh a, chawhrualin ni tin mi 1,036.88 hmuh chhuah an awm ang a ni. Kum 2011 chhiarpui aṭanga chhûtin Mizorama Covid-19 vei hmuh tawh 76,591 chu mi 1,000 zelah hripui vei mi 70 an awm ang a ni a; mi 1,00,000 zela Covid-19 vangin mi 23 an thi tawh ang a ni.

Ningania Mizorama Covid-19 vei hmuh chhuah zat 1,121 chu India rama state leh union territory 36 zingah hmuh tam lamah pangana a ni a; Mizoram aia hmuh tamnate chu - Kerala-ah mi 22,182, Maharashtra-ah 3,595, Tamil Nadu-ah 1,693 leh Andhra Pradesh-ah mi 1,367-te a ni.

Nimin zinga report tihchhuah a nih hnuah Mizoram chuan hripui vei enkawl mek (active case) tam lai ber a tawng leh a, enkawl mek mi 13,888 an awm. India ram puma active case tam lamah parukna a ni zui zel a, hmarchhak state bikah a sang fál hle a, Mizoram hnaih bertu Assam-ah enkawl mek mi 5,381 an awm. Mizorama Covid-19 positive hmuh tawh aṭanga enkawl mek zat chu 18.13% a ni a, Mizoram dawta sang ber Kerala chu 4.20% a ni.

Nimin khan tlai dar 5 thlengin hripui vei dam tawh mi 544 chhuahtir an ni a; Aizawl district-ah mi 252, Lunglei district-ah 80, Kolasib district-ah 74, Lawngtlai district-ah 59, Mamit district-ah 53, Champhai leh Hnahthial district-ah 12 leh Saitual district-ah pahnih an chhuak.