KHAWTHLIR

Tanpuina hlan
Swasth Digital Health Foundation leh World Vision India ten Mamit district tana Covid-19 dona hmanraw chi hrang hrang Rs. 10,37,500 man an pek chu nimin khan Mamit bialtu MLA H Lalzirliana leh Dr K Pachhunga, MLA ten Mamit Chief Medical Officer leh Medical Superintendent hnenah an hlân. Khawzawl Officers' Club pawhin nimin khan Khawzawl district-a chhuanchhamte ṭanpui nan Khawzawl DC hnenah Rs. 74,000 an hlân bawk.

Swachhata Shramdaan
Azadi Ka Amrit Mahotsav pualin nimin khan Lawngtlai District Water & Sanitation Mission chuan faina hnatlangpui - Swachhata Shramdaan an hmang ṭan a, Lawngtlai Areopagy-ah bawrhsap Dr Andrew H Vanlaldika'n a hawng. Hnatlangpui hi Lawngtlai khawpui leh RD Block hmunpuite bakah, Cheural, Lunghauka leh Hmunlaiahte hman a ni dawn a, ODF Plus ni tura hmalakna atan wall painting leh slogan writing intihsiak buatsaih a ni bawk ang.

Vaivakawn jubilee
Minister of state Lalruatkima chuan nimin khan a bial chhunga Vaivakawn kum 120 tlin lawmna leh Vaivakawn Branch YMA golden jubilee lungphûm Vaivakawn Bazarah a hawng a; bialtu councillor C Lalfakzuala, Central YMA president Vanlalruata leh YMA hruaitu dangte'n an hmanpui. Vaivakawn Branch YMA hi kum 1971-ah Dawrpui Vengthar aṭangin a indang a, a din tirhah member 113 awmin, tunah member 2,445 an awm mek a ni.

Tanpuina pek dan tur tichiang
Inkhârkhip leh inkhuahkhirh vanga khawsaknaa harsatna tâwkte ṭanpuina tura LPS Vision leh ZONET Cable TV-in charity concert aṭanga an hmuh Rs. 23,45,000, Aizawl DC Fairelbel Charity Fund-a an pek chu Aizawl khawpuia veng hrang hranga mi 147 hnenah sem tura ruahman a ni.