Tuipuiral leh Hnahthial district-ah Myanmar ráltlân 4,176 an awm
Myanmar tualchhung buaina avangin Mizoramah ráltlân an rawn luh belh zel a, September 18, Inrinni leh nimin pawh khan mi eng emaw zat an rawn luh belh. Ráltlânte'n an pan ber Champhai district-a Tuipuiral leh Hnahthial district-ah nimin chawhnu thleng khan ráltlân mi 4,176 an awm mek.
Mizorama ráltlân awm mek mi 4,176 zinga mi 2,168 chu Champhai district-a Tuipuiral huam chhunga awm an ni a; mi 2,009 chu Hnahthial district chhunga awm an ni thung.
Tuipuiral Group YMA secretary B Challianngura'n Vanglaini a hrilh danin, an group huam chhungah nimin chawhnu thleng khan Myanmar ráltlân 2,168 an awm mek a; niminah pawh mi eng emaw zat an luh belh leh a, a zat chiah erawh hriat theih a la ni lo.
B Challianngura chuan, nimin khan Saṭâwm khuaa awm zawng zawngte'n Mizoram an pan nia an hriat thu sawiin, "Ṭiau luiah Vaphai YMA-te'n an lo buaipui ang. Ṭiau lui an rawn kân nghal a nih pawhin, Saikhumphaiah awmtir phawt an ni ang. Saṭâwm khaw mi 83 chu nimin (Inrinni) khan an rawn kal tawh a, Ṭiau kamah an awm a, mahse, eng emaw zat chu an lêt leh a ni," a ti.
Tuipuiral huam chhunga ráltlân nei tam ber Farkawnah mi 853 an awm mek a, Vaphaiin dawtin, mi 337 an awm a, Thekte-ah mi 215 an awm bawk a, mi dang zawng chu khaw hrang hrang 18-ah an awm a ni.
Hnahthial aṭanga thu dawn danin, Hnahthial district-ah nimin chhun thleng khan Myanmar ráltlân 2,009 an awm mek a, chhungkaw 342 an ni. Mi 2,009 zinga 1,310-te chu tun hnai, September 10, 2021-a Myanmar sipaite leh tualchhung sipaite inbeih hnua rawn lutte niin, mi 699 erawh chu a hmaa lo awm tawh sate an ni.
Nimin khan mi eng emaw zat an rawh luh belh a, lut zat chiah erawh hriat theih a la ni lo a, hriat chian chinah mi pasarih lutin, Hnahthialah an awm anga chhinchhiah a ni. September 18, Inrinni khan mi 10 an lut anga chhinchhiah a ni a, September 7, Zirtawpniah mi 32 an rawn lut anga chhinchhiah a ni bawk.
Hnahthial district-a ráltlân dawng tam ber Thingsai khuaah mi 862 awmin, chhungkua 120 an ni a, a dawttu New Ngharchhipah chhungkua 84-a mi 432 an awm a ni.
