ZMC hotute'n SRH-a thawk tur Nurse (volunteer) an hmu zo lo

September 18, Inrinni khan Health minister Dr R Lalthangliana hoin Secretariat conference hall-ah Mizorama Covid-19 dinhmun thlirho a ni a; Zoram medical College hotute chuan, SRH-ZMC-ah thawktu nurse (volunteer) indaih lohna a nasat thu leh mamawh ang zat thawk tur mi an inhmuh zawh loh thu an sawi.

ZMC hotute chuan, an damdawi-ina ICU-ah khum 34 leh ward hrang hranga khum awmte a khah deuh reng thu sawiin, "Damlote zingah na tak tak an tam hle. Tun hnaiah phei chuan upa lam aiin naupang zawkte zingah ICU ventilator mamawh an tam tawh," an ti.

Thawktu an indaih loh thu sawiin ZMC hotute chuan, "A bik takin staff nurse indaih lohna a zual a, kan mamawh ang zat thawk tur mihring kan inhmu zo lo," an ti a; sorkarin volunteer 123 lâk a phalsak angin lak an ni a, mahse, an zinga mi 26 chuan an chawlhsan leh tawh thu leh anmahni thlaktu tur an la zawn hmuh zawh loh thu an sawi.

Health Minister chuan hripui donaa thawktu pawl hrang hrangte'n theihtawp chhuah mah se, Mizoram dinhmun chu an beisei ang a ni thei rih lo tih a sawi a, "Beidawn leh chauh sawi loa theihtawp chhuah ṭâng ṭânga kan la ṭang tlang tlat thei hi a ropui tak zet. Kan thawhhona a ṭhat avanga rilru inhawng zau taka kan inráwn khawm zel thei hian hmalak a tiawlsam a ni," a ti.

Ṭhutkhawmah hian district hospital-a doctor leh nurse-te chu SRH-ZMC-ah Covid-19 veite enkawl dan tur (critical care) practical training neihtir a pawimawh an tih thu te, Aizawl Civil Hospital-ah Covid-19 veite enkawlna tur khum 10 awmna ICU peih thawkhat a nih thu te, khum pali awmna Pediatrics ICU peih ṭêp a nih thu te, ZMC-ah ICU ward siam belh a ṭul thute an tarlang.

Covid-19 vaccine lak tlemna district-ahte beihpui thlak tum a nih thu te, harsatna vanga vaccine lakna hmun pan ve thei lote chhui chhuah a, mobile team dina an ina kal chilh tura ruahmanna siam ṭha an tih thute an sawi bawk a; zin veivâkte buaipui dan, khung hran dan leh swab sample endik dana inkaihhruainate chu ennawn an rél a ni.

Ṭhutkhawmah hian DMR minister Lalchamliana, Covid MOT chairman Dr ZR Thiamsanga, MLA, chief secretary Lalnunmawia Chuaungo, Aizawl DC, AMC councillor te, Health department, Police, ZMC, Aizawl City Local Council Association, MKHC, IMA leh NGO Coordination Committee aiawhte an tel.