PAHOSS dawng turin mi 403 thlang tawh

Mizoram sorkar chuan Parking House Support Scheme (PAHOSS) dawng turin mi 403 a thlang tawh a, chung zinga mi 11 chuan parking house an sa zo tawh. PAHOSS dawng tura thlan mi 403 chuan pawisa an la dawng kim vek lo.

Vanglaini thu dawn danin, PAHOSS buaipuitu UDPA department chuan ṭanpuina dawng tawh zingah hna thawk miah lo emaw, thawk ṭha lo emaw an hre rih lo. PAHOSS hnuaia ṭanpuina dawng hna thawk ṭha lo an awm chuan inkaihhruaina angin hrem theih an ni.

Parking house sak zawh hun tura sa zo lo emaw, sak tura ruat aia tlem sa emaw an awm chuan ṭanpuina sum an dawn tawh sa pawh first instalment an dawn aṭangin 15%-a a pung nen sorkar (department)-ah pek lettir theih a ni.

In sak zawh hnuah pawh a nihna tur anga hman a nih loh chuan AMC-in emaw, sorkarin emaw a kalhsak thei a, in pumpui khàr thlenga hrem theih a ni bawk.