Minister Lalchhandama Ralte leh Jal Shakti minister inkâwm

School Education minister Lalchhandama Ralte chuan September 18, Inrinni zing khan Jal Shakti minister Gajendra Singh Shekhawat chu Delhi-a a chenna inah a kâwm a, Mizoram sorkar sikul zawng zawngah ruah tui khawlna siamna tur project Samagra Shiksha-in School Education department-a a thehluh tawh chu bawhzuisak turin a ngen.

Lalchhandama Ralte chuan, Mizorama sorkar sikul 2,554 - primary school 1,297, upper primary school 947, high school 290 leh higher secondary school 20 tan ruahtui khawlna senso tur Gajendra Singh Shekhawat a dil a ni.

Mizoramin fûr laiin ruahtui tam tak dawng ṭhin mah se, a dah khâwlna tur awm loh avangin kum tluanin tui thianghlim in tlak a awm thei ṭhin lo tih sawiin Lalchhandama chuan, "Tui thianghlim in tlak sikula a awm ṭhat chuan chawchhun atan te, kut silfaina atan te, inthiarna atan leh sikula nunphung hrisel leh fai neihna atan a ṭangkai hle dawn a ni," a ti. A thu thlen hi Jal Shakti Minister chuan bawhzui a nih tur thu a lo hrilh.

Minister Lalchhan­dama Ralte hi Samagra Shiksha state project director Lalhmachhuana'n a ṭawiawm a ni.