Pension-te chanvo tifel vat turin phût

ZPM party ṭhalaite chuan thuchhuah siamin, sorkar hnathawk chàwl tawhte pension chanvo chingfel thuai turin Mizoram sorkar an phût.

ZPM Ṭhalai chuan, Assembly session zawh taka zawhna leh chhannaa a lan danin, January 1, 2019 aṭanga July 31, 2021 inkarah sorkar hnathawk pension tihfel loh, file kal mek mi 302 an awm tih tarlan a nih thu an sawi a, "File la kal lo eng emaw zat an awm a rinawm bawk. Sorkar hna aṭanga chàwl tawh mi ṭhahnem tak pension tihfel loha an awm hi fel lo kan ti a, pensioner chhungkua tam tak chu dinhmun khirh takah awmin, an mangang tawh hle a ni," an ti.

Sorkar hnathawk pension tawhte'n an chan tur an hmuh thuai theih nan ZPM ṭhalaite chuan Finance changtu chief minister Zoramthanga an ngen a; "Thil dangah sum a awm zel tho avangin sorkar hnathawk pension chinfel loh chhanah hian sum awm loh chu chhuanlama hmang lo turin kan ngen a ni," tiin an tarlang.