Covid-19 vangin mi 5 thih belh

Covid-19 vangin September 18, Inrinni khan mi panga an thi a, niminah thi an awm lo. Sorkar chhinchhiah angin, nimin tlai dar 5 thleng khan Mizoramah hripui vanga thi mi 259 an awm tawh a, September thla bikah mi 42 an thi tawh.

Covid-19 vei enkawl lai C Vanlalsiama (62) h/o Laltlankimi, Dawrpui chu September 17, Zirtawpni zan zanlai pelh hnu, September 18 dar 00:55 khan State Referral Hospital-ah a thi. Lung ṭha lo nei sa a ni a; Covid-19 positive a ni tih September 11 khan hmuh chhuah niin, SRH-ZMC-ah dah luh nghal a ni.

Lalhnuna (62) h/o Lalhmingmawii, Electric Veng, Aizawl/Khawzawl chu Inrinni chhun dar 12:15 khan SRH-ah a thi. Thu dawn danin, Lalhnuna hi cancer nei sa a ni a, Covid-19 vei a ni tih September 12 khan hmuh chhuah niin, SRH-ah enkawl nghal a ni.

Inrinni chawhnu dar 1:30 khan C Vanlalhruaia (65) h/o Lalhliri, Venghlui pawh Covid-19 vangin SRH-ZMC-ah a thi a, nimin khan vui a ni. Covid-19 vei a ni tih September 16 khan hmuh chhuah a ni a, SRH-ah admit nghal a nih thu sorkar thuchhuakin a tarlang.

H Thangkhuma (82), Tuikual South chu Inrinni zan dar 8:30 khan SRH-ah a thi. Covid-19 positive a ni tih September 6 khan hmuh chhuah a ni a, September 9 aṭangin SRH-ah enkawl a ni.

Inrinni zan vek dar 9:30 khan Penguka (60) h/o Vankipnuami, Dawrpui Vengthar chu SRH-ZMC-ah a thi a, hripui vanga thi 259-na a ni. Covid-19 vei a ni tih September 5 khan hmuh chhuah a ni a, a tuk September 6-ah SRH-ah dah luh a nih thu sorkar thuchhuakin a tarlang.