Partial lockdown kalpui danah Sumdawngte an lungawi lo

Mizoram Business Coordination Committee (MBCC) chuan, Mizoram sorkarin partial lockdown kalpui chhunzawm a tum dan chu lungawithlak loh an ti a, Chief Minister hnenah an harsatna thlen an tum.

Tun hnaia MBCC hruaitute ṭhukhawm chuan sorkarin partial lockdown a kalpui dan an thlir a, "Kum hnih chhung eizawnna hna thawk mumal thei loa kan awm tawh avangin harsatna kan tawhte Chief Minister hnenah thlen ni se," an ti a; Chief Minister-in a dawnsawn dan azirin an kal zel dan tur ngaihtuah leh an tum.

MBCC-ah hian sumdawng pawl hrang hrang 71 an tel a, páwl hrang hrang aṭanga ngaihdan lutte an sawi khâwm hnuah, Mizoram sorkarin partial lockdown a puan dan chu lungawithlak loah MBCC hruaitute chuan an ngai a ni.

MBCC hruaitute chuan, sorkarin partial lockdown a kalpui leh chu ram dinhmun enin an zo tawh loah an ngai tih sawiin, "Fimkhur leh uluk taka hri léng laka himna tura inkaihhruaina zâwm chungin eizawnna hna thawh theih dan ngaih-tuah a ngaiin kan hria. A ṭul dan anga che chhuak mai thei tura committee thu ngaichâng turin member-te kan ngen a ni," an ti.