KHAWTHLIR

Thisen pe
September 18, Inrinni khan Aibawk Branch YMA chuan Zoram Medical College tan an YMA Hall-ah thisen unit 90 an pe a, petute mipa 67 leh hmeichhia 23 an ni. ṬKP, Zotlang Bial, Aizawl pawhin Civil Hospital, Aizawl tan thisen unit 40 an pe a, petute mipa 37 leh hmeichhia pathum an ni. LIKBK Ṭhalai Pawl, Lawngtlai Chandmary Pastor Bialte'n LIKBK Bethel Hall-ah District Hospital tan thisen unit 26 an pe bawk a, mipa 22 leh hmeichhia paliin an pe a ni.

Tanpuina hlân
Aizawl South-I bialtu MLA C Lalsawivunga chuan September 18, Inrinni khan a bial chhunga community covid care centre-te a tlawh kual a; Bethlehem Vengthlang, College Veng leh Republic Vengthlang CCCC-a awmte tan buhfai, dailuah, tél leh alu ṭhahnem tak a pe. AMC Ward-III councillor C Lalchhandami pawhin a bial chhunga Ramhlun Sports Complex tana India Formosa aṭanga a dil chhuah oxygen concentrator chu Inrinni khan LTF Chairman hnenah a hlàn a ni.

DC-in tlawh
Khawzawl DC CC Lalchuangkima chuan tun hnai khan Khawzawl Darngawn rama bawlhhlawh sakhat sawngbawlna tur cheng nuai 48 senna tur Solid Waste Management Centre siam mek a tlawh a, hna thawktute'n harsatna an neihte a sawipui.

Seminar buatsaih
UDPA department leh Mizoram University-a Civil Engineering department chuan September 17 khan Assembly House Annexe conference hall-ah 'Seminar on Technology and Innovation of AWAS PAR SAMVAAD' an buatsaih. UDPA department hnuaia khawpuia mirethei in sak enkawltu Town & Country Planning, AMC, MZU Civil Engineering department, Zamzo Real Estate/ Evergreen Pre-fab Solutions, Aizawl Smart City, Mizoram Architect Forum, Biakliana & Sons aiawhte an tel.

Kawngpui enfiah
Champhai Road Protection Squad Committee chu an chairman Lalnunfela Chawngthu, sub-divisional magistrate hoin New Champhai, Zion Veng leh Bethel Venga kawngpui nêkchêp zawnga hmalaknate an endik. Kawngpui nêka in sa, leivûng paih, lirthei inhûn thuah leh bungraw hungte la sawn turin an hriattir a; mi pahnih hnenah hun bituk chhunga insenghawi tura hriattirna lehkha an pe bawk.