Covid-19 vaccine la tawh zinga A zatve aia tamin an la kim tawh
Mizoramah January 16, 2021 aṭanga September 18, 2021 thleng khan Covid-19 laka invenna damdawi (vaccine) Covishield dose 10,33,497 pek a ni tawh a; vaccine la tawh zinga a zatve aia tam, 54.29%-in an la kim tawh.
Integrated Disease Surveillance Programme (IDSP) tarlan danin, September 18, Inrinni khan Covid vaccine dose 4,507 pek a ni a, mi 545 hnenah dose khatna leh mi 3,962 hnenah dose hnihna pek a ni. Vaccine pek tawh 10,33,497 zinga 6,69,825 (64.82%) chu dose khatna a ni a, 3,63,672 (35.18%) chu dose hnihna a ni.
September 18, 2021 thlenga Covid vaccine dose 10,33,497 pek tawhte chu Mizoram sorkarin a pek dose 10,29,729 leh private facility-a pek dose 3,768 a ni. Mizoram sorkar ruahmanna hmunah dose khatna 6,67,711 leh dose hnihna 3,62,018 pek a ni tawh a; private facility-te'n dose khatna 2,114 leh dose hnihna 1,654 an pe tawh bawk.
May 17, 2021 aṭangin kum 18-44 inkarte hnenah vaccine pek ṭan niin, Inrinni thleng khan dose 5,25,941 pek a ni tawh a, Mizorama vaccine tawh zawng zawng 10,33,497 aṭangin 50.89% a tling. Kum 18-44 inkar vaccine pek tawh mi 3,93,818 zinga 1,32,123 (33.55%)-in dose kimin an la la thung a, vaccine pek tawh hlâwm ṭhen (category) zingah dose khatna la tawh aṭanga chhûta dose kima la tlemna ber a ni.
Covid-19 vaccine pek tawh hlâwm ṭhen hrang hrang zingah kum 60 chung lam zingah dose kima la tawh an tam ber a, kum 60 chung lama vaccine pek tawh mi 63,146 zinga 59,473 (94.18%) chu la kim tawh an ni.