September 1-15 inkara Covid-19 vei zingah kum 11-20 inkar an tam ber

Thla kal mek, September thla chanve (ni 1-15) chhung khan AMC area-a veng 85-ah Covid-19 vei hmuh chhuah a ni. Hripui vei hmuh zawng zawng chu 15,458 a ni a, kum 10 bia ṭhenin hripui vei hmuh chhuah zinga kum 11-20 inkar mi 3,192 awmin an tam ber.

September 18, Inrinnia Health & Family Welfare minister Dr R Lalthangliana hoa Secretariat conference hall-a Mizorama Covid-19 dinhmun thlirhonaa police contact tracing team-in an tarlan danin, September thla chanve chhunga AMC area-a veng 85-ah hripui vei hmuh chhuah a nih bakah, Aizawl páwn lamah khua/veng 406-ah hripui vei hmuh a ni. Mizoram páwn aṭanga rawn lut mi 16 an awm bawk.

Thla chanve chhunga Covid-19 positive hmuh chhuah 15,458-te chu mipa 7,342 leh hmeichhia 8,116 an ni a, a tam ber chu kum 30 hnuai lam an ni. Kum 30 hnuai lam hmuh chhuah dan chu - kum 21-30 inkar mi 2,997, kum 11-20 inkar mi 3,192 leh kum 10 hnuai lam mi 2,850 an ni.

September thla chanve chhunga Aizawla hripui vei hmuh tam zualnate chu - (a tam dan indawtin) - Bawngkawn, Bethlehem Vengthlang, Ṭhuampui, Zemabawk, Tuikual South, Republic Veng, Bethlehem Veng, Ramthar Veng, ITI Veng leh Durtlang Leitan te a ni.

August 2021 chhunga Covid-19 vei hmuh chhuah zingah negative certificate mamawh vanga sample endik, inrinhlelhna nei lo mi 135 an tel a; damdawi-ina inentir tura kal OPD-a endiknaa hmuh mi 176, healthcare worker mi 224, task force member 20, CCC-a thawk volunteer 12, positive enkawltu mi 26, nau pai 22 leh VTF/LTF-te'n an man mi paruk an awm bawk.