April 13-a ralthuam tung turin HPC(D)-te Mizoram an rawn thleng

Mizoram sorkar leh Hmar Peoples' Convention (Demo­cratic) ten inremna thuthlung an ziah tâk avangin, Manipur-a HPC(D) mi leh sate chu an ralthuamte nen nunphung pangngaia awm turin Inrinni khan Mizoramah hruai kîr an ni a; April 13-a Mizoram sorkar hnena ralthuam an tunna hmun tur CTI, Sesawngah awmtir nghal an ni.

Manipur aṭanga HPC(D) mi leh sa Mizorama hruai kîrte hi mi 100 an ni a, silai chi hrang hrang 48 bakah, silai mu eng emaw zat an rawn keng tel a ni.

Manipur aṭangin Inrinni zing khan lawng hmangin Tuiruang lui aṭangin Mizoramah an rawn lut a, Zilthaw phaiah Sakawrdai V/C-te'n lo hmuakin, tukṭhuan an buatsaihsak a; chumi hnuah Vaitin leh Sakawrdaiah anmahni lo lawmna hun buatsaih a nih hnuah CTI, Sesawngah hruai an ni.

HPC(D) mi leh sa, nunphung pangngaia lêt leh tura Mizoram rawn kîrte hi deputy army chief Lalbiaknunga'n a ho a; hetih lai hian, HPC(D)-te'n an ralthuamte Mizoram sorkar hnena ralthuam an tun hun tura ruahman April 12 chu April 13-ah sawn hlat a ni.

Tarlan tawh angin, Mizoram sorkar leh HPC(D) hel pawl inkara remna kawng zawnga inbiakna hi August 10, 2016-ah Aizawlah ṭan a ni a, ṭum ruk inbiak a nih hnuah inremna thuthlung, Memoramdum of Settlement siam a ni. Inremna thuthlung hi April 2, 2018 khan ziah a ni a, Mizoram sorkar aiawhin chief secretary Arvind Ray leh HPC(D) aiawhin an chairman H Zosangbera ten an hming an ziak a ni.