Infiamnaa hmasawnna hi ram changkanna tehfung a ni - CM
Thenzawl Sports Festival 2018 chu Loṭhazawl khelmuala volleyball pavilion-ah Inrinni khan khâr a ni a; festival khârna inkhawm hmanpuitu, chief minister Lal Thanhawla chuan, infiamnaa hmasawnna chu ram changkanna tehfung a nih thu a sawi.
Chief Minister chuan, Mizoramah ṭhalaite tan khawvel thar siam turin sorkarin hma a lak thu sawiin, "A bik takin infiamna lamah discipline hrang hrang tih hmasawn nan hmunhma ṭha leh changtlung tak tak district hrang hranga siam a ni. Chutihrual chuan, infrastructure ṭha tak siam chu a tâwk lo a, a hmangtu tur leh hman nachang hria an awm a ngai tel a ni," a ti.
Infiamna khawvela hlawhtling tluantling turin a thei leh thiam fál bik nih mai piah lamah, chhung lam leh páwn lam nun uluk te, ei leh ina fimkhur a, zûk leh hmuam leh ruih theih thil laka fihlim te a pawimawh tih sawiin CM Hawla chuan, "Infiammite mai ni lo, mipui pawhin nun phung hrisel zawk neih tuma kan nun ṭheuh a, hmasawn kan tum a ṭul," a ti a; infiamnaa tui mi leh theite chu tumruhna nena bei zel turin a fuih.
Lal Thanhawla chuan, tun dinhmunah Mizoramah hna thawk thei leh thawktu zingah a tam zawk ṭhalai an nih thu sawiin, "NEDP kaltlangin ṭhalaite zingah eizawnna thar hlâwk tak tak la ni thei turte ngaihtuah chhuaka bul ṭan an awm. Ṭhangtharte hian ngaihtuahna seng zel se, state pawhin chak zawka hmasawn theihna a nei a ni," a ti.
Thenzawl Sports Festival 2018-ah hian Thenzawl khuaa YMA branch-te an tel a, infiamna chi hrang hrang pakua hmangin an intihsiak a ni.