IMA-in NMC an duh loh thu an puang

Indian Medical Asso­ciation (IMA) chuan, sorkar laipuiin Medical Council of India (MCI) ṭhiat a, National Medical Commission (NMC) din a tum chu an duh lo a, NMC din luih a nih chuan, IMA hnuaia doctor zawng zawngte'n hna thawh loh an tum.

IMA senior vice pre­sident Dr Rajendra Airam chuan Inrinni khan Aijal Club-ah thuthar thehdarhtute a kâwm a; sorkar laipui duh dana NMC din a nih chuan mirethei zawkte'n nasa takin an tuar dawn nia sawiin, "NMC din a nih chuan doctor zir turin sum tam tak sen a ngaih dawn avangin, doctor zir tum mi retheite tan harsatna nasa zawk a thlen dawn a ni," a ti.

Dr Rajendra chuan, NMC hnuaiah hian Ayush doctor-te'n thla ruk an training chuan Allopathy doctor-te angin damlote allopathy damdawi an chawh ve theih dawn tih sawiin, "Hei hi kan duh lo. Kum li leh a chanve chhung kan zir ang thla ruk chhunga an ti ve thei tur hi kan duh lo," a ti a; Ayush doctor-te'n allopathy damdawi an chawh ve theih ngawt chu mipui tan pawha a him dawn lo niin a sawi.

IMA hotute chuan NMC hi Parliament-a pass tura chhawp chhuah a ni tawh thu an sawi a, "Sawiho a nih hmain Parliamentary Affairs Committee endik turin thawn leh a ni. He dan hi pass a nih chuan doctor-te'n hna kan thawk lo ve ang," a ti.

IMA-in NMC an duh loh chhante :
1) MCI-ah chuan state tin aṭangin member pahnih sorkarin doctor a ruat leh doctor-te thlan an awm ṭhin. NMC-ah chuan member 25 an awm dawn a, chu'ng zingah chuan doctor panga chiah ruat an ni dawn a, state member nei lo eng emaw zat an awm dawn. Member tur ruat tur deuh vek a ni a, democracy loah an ngai.
2) Medical college-a seat awm zingah tun hma chuan sorkar laipuiin 15% changin, college neitute'n15% chu an duh zat chhiarin an hralh thei a, seat la awm zawngah chuan sorkar laipuiin a bituk angin fee lak ṭhin a ni. NMC hman a nih chuan college neitute'n seat awm zinga 45%-ah an duh angin fee a bituk thei dawn a, chu chuan doctor zir man a tito ang a, mirethei tan doctor zir a har turah an ngai.
3) Kum li leh a chanve chhung an zir, exam hautak tak hmachhawn hnua an zir zawh ang Ayush doctor-te'n thla ruk chhung an training hnua an khawih ve thei tur ṭha an ti lo.
4) Tun hma chuan sorkar laipui hriatpuina hnuaia doctor-te an in register dawnin, MBBS an pass-na certifcate pawm ṭhin a ni. NMC hman a nih chuan doctor an in register dawnin MBBS certifcate pawm a ni dawn lo a, exam leh phawt a ngai dawn a ni.