KMMTTP-ah hna 72.79% thawk zo tawh ; December 2019-ah peih theih an beisei

PWD minister Lal Thanzara chuan Assembly budget session-ah MNF member Vanlalzawma zawhna ziaka chhangin, tun dinhmunah Kaladan Multi Modal Transit Tran­sport Project (KMMTTP) chu hna 72.29% zawh a nih tawh thu a tarlang a, "December 2019-ah peih theih beisei a ni," a ti.

PWD Minister tarlan danin, KMMTTP hnuaiah hian Mizoram chhung bikah Lawngtlai bulah zangnadawmna a fel loh avangin km. 1.20 vel leh, Zochachhuahah chenna in tihchhiat a ngaih avangin meter 200 vel kawng laih theih loh a awm a; mahse, kawng tàwp lam km. 1.500 laih mek tih loh chu kal theih a ni. Lei dawh hna thawh a awm nual avangin chu'ng hmunahte chuan fûr laiin lirthei kal a harsa rih.

KMMTTP atana origi­nal estimate chu cheng vbc. 575.69 a ni a, package thumah ṭhen niin, package-I atan cheng vbc. 170.15, package-II atan vbc. 163.11 leh package-III atan vbc. 168.98 ruahman a ni. Revised estimate vawi hnih siam a ni tawh a, a vawi khatnaah cheng vbc. 696.59 niin, a vawi hnihnaah cheng vbc. 1011.52 a ni.

DPR-ah chuan, KMMTTP chhungah hian ram nei mi 227 tarlan a ni a, chu'ng ram neite zangnadawmna pek atan leh forest clearance leh environment clearance atan cheng vbc. 27.39 sanction a ni. Lawngtlai DC-in pawisa a sem chhuah hnuah ram nei an pung a, pawisa pek chhuah tihtawp lailawk niin, ram lak tur zat a la chiang lo. Mi 160 hnenah cheng vbc. 9.27 zangnadawmna pek tawh a ni.