MNF MLA-in CADC sum bo chhui a phût

MNF party MLA Dr K Beichhua chuan, Chakma Autonomous District Council (CADC) sorkar ṭhiah a nih hma lawka Mizoram sorkarin cheng nuai 1020.60 a pek zinga 60% chu a bo nia sawiin, chhui chian vat an phût thu a sawi.

Dr K Beichhua hian April 6, 2018-a Mizo Hnam Runa inkhawma thu a sawinaah, CADC chu April 20, 2018-a inthlang mai tur an a, inthlan dawn hnaih têah, Governor's Rule-a an awm hma siin Mizoram sorkarin cheng nuai 1020.60 a pe tih a sawi a, "Nuai 1020.60 aṭang hian 60% hmanna mumal awm loin a bothlau ringawt mai a. Inthlan dawna pawisa tam tham tak bothlau hi ngawihbopui mai chi a ni lo a, thuneitute chhui chiang vat turin kan phût tlat a ni," a ti.

Dr K Beichhua sawi danin, CADC hnena cheng nuai 1020.60 pekna lehkha chu No.G.24014/6/2017-DC&MA/7 dt.28.02.2018 te, No.G.24014/3/2013(C)/Pt./118 dt.27.02.2018 leh, No.G.24014/3/2013(C)/3 dt.27.02.2018-te a ni a; March 28, 2018-ah Governor hnenah chhui chiang vat tura ngenna Kamalanagar MNF district hruaitute'n an theh­lut tawh a ni.

Sum bo chu Congress party hruaitu ṭhenkhatte'n election campaign-na atan hman tumin an kawl ṭha nia an hriat thu sawiin Beichhua chuan, sumbo chu rang taka zawng chhuah thuai leh a mawhphurtute hnenah action lak ngei a ṭul thu a sawi.

Dr K Beichhua chuan Legislative Assembly budget session neih zawh tak chungchang sawiin, 2018-19 sorkar budget-ah Congress sorkar nihna a lang chiang hle nia sawiin, "Mizoram mipui sum hi Congress sorkar hian Congress ni lote vuakna talhtum atan hman an tum ni berin ka hria, opposition MLA parukte pe ve si lo a, Congress MLA 34-te hnena DO Letter pea cheng nuai 400 ṭheuh NLUP dawng tur thlanna atan an pe bikte khan India democracy dan a kalh tlat a ni," a ti.