MIPEWA-in LṬP chêt dan an dem

Mizoram PWD Engineers Welfare Association (MIPEWA) chuan, an member C Lalchhuana, SE, PWD, Lunglei Circle April 2, 2018-a pisa kai tur Lunglei Ṭhalai Pawl (LTP) invuahte'n an tih dan chu indiriamna, dam chhunga ser reh thei tawh lo tur insiamsakna a nih thu an tarlang a, "Kan tuarpuiin ná kan tihpui tak zet. LṬP intite chet dan hi a Mizo lo a, Kristiante chêt dan turah kan ngai thei lo," an ti.

Khawtlang leh ram hmatheha hmang leh thuneihna inpe chawpa C Lalchhuana chunga LṬP chet dan chu Mizoramah a thlen an la hriat ngai loh thu sawiin MIPEWA chuan, "LṬP intite chêt dan uchuak tak vanga Mizoram khawpui lian ber dawttu leh sorkar hnathawk tan pawha thlakhlelhawm tak ni ṭhin an tihminghliau hi pawi kan ti tak zet," an ti a; Lunglei chu tun hnua sorkar hnathawk awm zel turte tan awm châk­awm a nih leh ngei an duh thu an tarlang.

MIPEWA chuan, sorkar hmalakna leh hna thawhah duhthusam lo leh felhlel a awm a nih pawhin, hmalak dan phung pangngai a awm reng tih an sawi a, "Chutih laia dan leh thupek kengkawhtute pawh zahder miah lo leh ring tâwk loa uchuak taka an che mai hi kan dem tak meuh a ni," an ti.