Lunglei SP dangtute police-in an man

Mizoram sorkarin a transfer avanga Lung­lei SP J Lalṭhafamkima chhuak tur chu Lunglei Ṭhalai Pawl (LṬP)-te'n April 6, Zirtawpni zan leh April 7, Inrinni khan an dang a; SP dangtute chu Inrinni chhun khan police-te'n an man a, Inrinni vek khan intiamkamna nen chhuah leh nghal an ni.

MPS officer Lunglei SP J Lalṭhafamkima transfer order hi March 6, 2018 tihchhuah a ni a, AIG (Training)-a awm tura tih a ni. A rual hian AIG (Training)-a awm lai Narayan Thapa, MPS chu Mizoram Home Guard-a SSO-a awm tura tih a ni.

Lunglei aṭanga thu dawn danin, J Lalṭhafamkima sawn chhuah a nih duh loh entirna atan LṬP invuahte chu SP Bangla kawtah an pung khawm a, Inrinni chhun dar 11:30 vel khan police-ten an man a ni. Police-in an mante hi mi 18 an ni a, mahse, chawhnu lamah PR bond-in chhuah leh nghal an ni. J Lalṭhafamkima pawhin amah dang­tute man an nih hnuah Lunglei chhuahsanin Aizawl a pan a ni.

LṬP chuan thuchhuah siamin, Lunglei SP J Lalṭhafamkima chu mi dik tak a nih thu leh transfer a nih chhan thuneitute aṭanga hriat an phût thu an tarlang a, "Hnam dang laka zirlai naupangte chhan duh si lo, Mizo ṭhalaite laka kut rang hle si sorkar hi kan dem tak zet a ni," an ti.

LṬP chuan, Lunglei district-ah ruling MLA pasarih an awm tih sawiin, "Kan aiawh tura kan thlan chhuahte'n kan kawngpui chhiat vanga hmalaknaah awká an neih duh miah lo hi kan dem tak zet," an ti a; kawng chhiat chungchanga mawhphurtu, mahni hna tlin lote hrem an la nih loh lai a, mahni hna tlin taka thawktu transfer a ni chu an hriatthiam loh thu an tarlang bawk.

MSU pawhin thu­chhuah siamin, LṬP mi leh sa mante chu thubuai siamsak lo a, chhuah leh nghal turin sorkar an phût tih an tarlang a ni.