2017-18 chhungin HIV hrik pâi mi 322 an thi
Mizoram State AIDS Control Society (MSACS) chhinchhiah danin, sorkar kum liam ta, 2017-18 chhungin HIV hrik pai thi mi 322 an awm tih Health minister Lal Thanzara'n Assembly House a hrilh.
Assembly session zawh taka Dr K Beichhua zawhna Health Minister-in ziaka a chhan danin, kum 2017-18 chhunga Mizorama HIV+ve thi zat chu mi 322 an ni a; Mizoram sorkarin HIV darh zel tur venna policy a duan thu leh, hmalak dante tarlan a ni.
Health Minister-in HIV darh zel tur venna kawnga hmalak dan a tarlante chu - HIV/AIDS awareness campaign (seminar, training leh media kaltlang)-a neih te, advertisement hmanga ṭan lak te, insûm thei lote tan condom leh hriau thianghlim pek te, thisen thianghlim lak kawnga ṭan lak te, HIV/AIDS veite hnualsuat/endawng lo tura ṭan lak te, inenkawlna leh inchhawmdawlna lama hmalakte leh HIV/AIDS counselling and testing centre dinte a ni.
Hetih lai hian, kum 2017-18 chunga cancer vanga thi zat zawhna chu, 'Kum 2017-18 ah cancer vanga thi official data a la awm lo,' tih a ni a; zu kaihhnawih natna vanga thi zat zawhna pawh, 'Mitthite hi an thihpui natna chauh tarlan a nih ṭhin avangin ruihhlo vanga thi zat department-in record a nei lo," tih a ni bawk.