NE leh East Zone IGNOU hotute ṭhukhawm

Indira Gandhi National Open University (IGNOU) hnuaia North East leh East Zone (Orissa, West Bengal, Assam, Arunachal Pradesh, Nagaland, Mizoram, Tripura, Sikkim, Manipur, Meghalaya) Directors Meeting chu Inrinni khan Aijal Club-ah neih a ni a, minister Lalsawta'n a hawng.

Finance Minister chuan, IGNOU hnuaia course hrang hrang zir theih a ni chu lawmawm a tih thu sawiin, "IGNOU zarah Zoram dung leh vângah zirlai tam takin zirna an dawng hi hmasawnna a ni. Mizoramah human resource a tam a, human resource hi zirna hmangin kan tichangkang thei a ni," a ti.

IGNOU vice chancellor, Prof. SB Arora chuan, North East leh East Zone-a Regional Director Meeting an buatsaih chhan sawiin, "Inpawhna ṭha zawk, inrualkhai leh chak taka hma an lak theihna tur leh tun aia zau zawka rawng an bawl theihna tura intihchak tawnna atan a ni," a ti a; tun dinhmunah ram pumah IGNOU Learner Support Centre 3,000-ah zirlai nuai 10 chuang an awm a, Mizoramah zirlai 6,000 vel an awm thu a sawi.

Mizoram University vice chancellor Prof. Sambasiva Rao pawhin thu sawiin, IGNOU system chu a ṭhat avangin a pass chhuakte pawh university dangte'n an en hrang lo tih a sawi a; Mizo zirlaite chu state chhung chauha lehkha zir leh hna zawn tum lo a, páwn lama chhuak tam turin a chah.

Meeting zawha thuthar thehdarhtute a kawmnaah INGNOU vice chancellor Prof. SB Arora chuan, IGNOU-in programme 240 an kalpui mekah Mizoramah programme 67 an kalpui thu a sawi a, "IGNOU hi zirlaite hnena zirna hmanrua (study material) a thlawna pe theitu a nih avangin zirlaiten hmang ṭangkai kan duh a ni," a ti.