KHAWTHLIR

April 15-ah vui dawn
April 5, Ningani zinga thi Lalthangliana Sailo (95), Maryland, USA chu April 15, Pathianniah Maryland-ah vui a ni dawn. Vui a nih tûk, April 16, Thawhṭanni chawhnu dar 1-ah Laipuitlang, Aizawla an inpuiah thlânṭhut tura ruahman a ni.

Thisen pe
Inrinni khan Zemabawk North Bial KṬP-in Synod Hospital tan thisen unit 53 an pe a, a petute mipa 45 leh hmeichhia pariat an ni. Serchhip Kawnpui Branch KṬP pawhin Serchhip District Hospital tan unit 40 an pe a, a petute mipa 33 leh hmeichhia pasarih an ni. Aizawl Civil Hospital tan Salvation Army Youth, Khatla corps member mipa 22 leh hmeichhia parukin unit 28 an pe a, Evangelical Church of India (ECI) Kristien Ṭhalai Pawl member mipa 14 leh hmeichhia parukin unit 22 an pe bawk.

YMA-in duh lo
Serchhip Chanmari Branch YMA chuan, Tarpi tlang pang chu in hmun atan ṭheh tumna a awm nia hriain, Serchhip-VII Village Council chu ngaihtuah nawn leh turin ngen an tum. Tarpi tlangah hian Serchhip-VII V/C huam chhunga khawsa, in dang tawh leh in hmun la nei lo tan in hmun dil theih a ni a, April 14, 2018 thleng dilna thehluh theih a ni.

Seminar buatsaih
CMS Coaching Academy chuan Inrinni khan Synod Conference Centre-ah 'Seminar cum Counseling on Overseas Education & Job' tih an buatsaih a, Mizoram Youth Commission chairman Joseph Lalhimpuia'n a hmanpui. MYC Chairman chuan, state dang leh khawvêl ram dangah hna thawk leh lehkha zira awm tûrte hnenah an thlen chin apiang chu 'Kan ram a ni' ti theia rilru siam tûrin ṭhalaite a chah.

IKK thalai rorel
Isua Krista Kohhran Thalai general headquarters (Upper Republic) chuan April 6-8, 2018 chhung khan ITI Venga IKK Kohhran biak-inah rorel inkhawm vawi khatna an hmang a, thupui chu 'I rawngbawlna kha hlen rawh' tih a ni. Inrinni khan leader Rev. Lalronghaka kaihhruaiin ro an rel a, rampum huapin HIV/AIDS lam hawi inzirtirna neih te, education campain neih leh, kum 2018 chhungin nungcha humhalh kawng-ah hmalakte an rel a ni.