Mi panga thattu Laltlanchhuaha Dam chhung táng tura hrem a ni

Laltlanchhuaha hi January 9, 2015 zan dar 7:30 velah Sangliansiama te inah lûtin, Sangliansiama bakah, a nupui Khualthangi (57), an fapa Isaac Lalrinnunga (5), Sangliansiama farnu Vanlalchhungi (54) leh Samuel Lalrinchhana (14), Sangliansiama farnu fate a that a ni. Tualthattu chu police-in an man a, thubuai an siamsak.

Court chuan Laltlanchhuaha thubuaiah hian November 3, 2020 khan thutlukna siamin, puh a nihna zawng zawngah thiam loh a chantir a, nimin chawhma dar 11 khan hrem dan tur a puang leh a ni.

Hremna puan a nih dawn hian buaina awm palh thei venna atan Court tualah police eng emaw zat duty tir an ni a; thutlukna puannaa awm phalsak chinte pawh chawhma dar 10-ah Court huang chhunga lut vek tawh tura tih an ni bawk.

Laltlanchhuaha hi mi panga a thah avangin IPC Section 302 (tualthah), IPC Section 307 (tualthah tum) - Sangliansiama te awmpui thah a tum avangin (bathroom-ah a inkalh khum avangin a him) leh, IPC Section 449 - tualthah tuma mi ina a luh thubuaiahte thiam loh chantir a ni.

IPC 302 leh 449 hmanga thiam loh chantirte chu dam chhunga tàn emaw, thi tur emawa hrem tur an ni a; IPC 307 hnuaia thiam loh changte chu dam chhung tàntir emaw, kum 10 jail táng tura hrem tur a ni thung.

Court chuan, Mizoram Victims of Crime Compensation Scheme 2011 angin Laltlanchhuaha'n a thah mi pangate chu zangnadawmna a tlem berah Rs. 2,00,000 ṭheuh tal dawng turin a ti a; kalphung pangngai anga hma la turin District Legal Services Authority, Aizawl a hriattir nghal.

Vanglaini palai zawhna chhangin Sangliansiama chhungte chuan, Court thutlukna an khin lêt dawn leh dawn loah thutlukna an la siam loh thu an sawi a, "Khawtlang hruaitute nen inráwn chungin a ṭul angin hma kan la zel ang," an ti.

Hetih lai hian, Republic Veng JAC chuan thuchhuah siamin, Laltlanchhuaha chu khai hlum ngei ni se tih chu an dinna a la nih reng thu an tarlang a, "Hemi chungchangah hian mitthi chhungte nen kan sawiho ang," an ti a; an kal zel dan tur an la rêl tur thu an sawi.

•    Tualthah tuma mi ina luh thubuai IPC 449 hmangin hrehawm taka kum 10 lung-ina tàn leh Rs. 2,00,000 chawi; pawisa a chawi loh chuan kum hnih dang jail-a tàn.

•    Tualthah tumna thubuai IPC 307 hnuaiah hrehawm taka kum 10 tàn leh Rs. 2,00,000 chàwi; pawisa a chawi loh chuan kum hnih dang jail-a tàn.

•    A chunga thubuai pahniha hremna, kum 20-24 chhung hrehawm taka a tàn hun a tlâk hnuah chauh mi panga a thah thubuai, IPC 302 hnuaia hremna a inṭan ang.

•    IPC 307 leh 449 hnuaiah kum 20 chhung hrehawm takin a táng phawt ang a, chumi chhung chuan pawisa chawi tur Rs. 4,00,000 a chawi loh chuan kum 24 hrehawm takin a táng ang.

•    IPC 302, tualthah thubuaiah dam chhunga tàn leh mi pakhatah Rs. 2,00,000 ṭheuh chawi (mi pangaah Rs. 10,00,000); pawisa a chawi loh chuan kum 10 dang a tàn belh ang.

•    IPC 307 leh 449 hnuaia kum 24 a tàn hun a zawhah IPC 302 hnuaia dam chhunga a tàn hun a inṭan chauh ang. IPC 302 hnuaia hremna pakhat - pawisa chawi tur a pek loh chuan dam chhung lung-in tàn bakah, kum 10 dang (pawisa pek loh aiah) a tàn belh leh phawt ang.

•    Kum 34 chhung (cheng nuai 14 chawi tur a neih loh chuan kum 34 a lo ni ang a) a tàn bakah, dam chhung lung-in táng tura tih a ni.

•    A thubuai Court-a kalpui leh ngaihtuah a nih chhunga jail-a a lo tàn tawh (kum 5 chuang) chu a tàn hun chhung turah chhût tel tur (paih tur) a ni.

•    Dam chhunga tàn tih hi Supreme Court thu­tlukna angin, taksa dam chhung tak tak a ni a, a dam hun chhung zawng a tang dawn tihna a ni. Amaherawhchu, sorkara thuneitute'n a tàn hun chhung tur an titàwi thei thung.