COVID-19: Mizoram dinhmun Hripui vei mi 6 hmuh belh a ni
November 8, Pathianni khan Mizoramah Covid-19 vei mi paruk hmuh chhuah a ni a, Mizorama hripui vei hmuh tawh zawng zawng chu mi 3,096 an ni. Nimin khan hripui laka fihlîm tawh mi 19 chhuahtir an ni thung.
Covid-19 vei hmuh thar parukte chu Rapid Antigen Test (RAT) hmangin Aizawl, Kolasib leh Mamita hmuhte an ni a; TrueNAT-PCR hmanga endik zingah hripui vei hmuh an awm lo a, ZMC laboratory chu khâr a nih avangin sample test a ni lo.
Hripui laka fihlim tawh mi 19 chu nimin khan chhuahtir an ni a; SRH-ZMC aṭangin mi paruk, CCC paruk - Lunglei Pukpui, Lunglei Sazaikawn, Serchhip Nursing School, Lawngtlai leh Mamit aṭangin pahnih ṭheuh, Kolasib CCC aṭangin pakhat leh home isolation-a awm pahnih an ni.
November 8, Pathianni khan RAT hmanga district paruka mi 118-te swab sample endik aṭangin Covid-19 vei mi paruk hmuh chhuah a ni a; TrueNAT-PCR hmanga district pahniha sample 52 endik zingah hripui vei an awm lo a, ZMC laboratory khâr a nih avangin sample endik a ni lo.
RAT hmanga Covid-19 positive hmuh chhuah thar parukte chu mipa panga leh hmeichhia pakhat an ni a, kum 23 leh 65 inkar, Aizawl khawpui chhung, Mamit district leh Kolasib district-a hmuhte an ni.
Aizawla hripui vei hmuhte chu Mizoram chhunga kái vek an ni a; Chanmari West-a hmeichhia kum 65 mi chu taksaa natna lang chhuak niin, hri a kai ṭanna hriat a ni lo. Electric Venga mipa kum 23 pawh symptom nei a ni a, a kai ṭanna erawh hriata ngaih a ni. Ramthar Venga mipa kum 52 mi chu kai ṭanna hriat leh symptom nei lo a ni thung.
Kolasib-ah Covid-19 positive mipa pahnih hmuh a ni a; 110 BSF sipai kum 37 leh 50 mi, Dhubri, Assam aṭanga rawn lut, quanrantine facility-a khung hran niin, symptom an nei lo.
Mamita RAT hmanga endik zingah hripui vei, Hriphaw khuaa mipa kum 50 mi, tun hnaia Assam aṭanga rawn haw hmuh chhuah a ni a, quanrantine facility-a khung hran lai, symptom nei lo a ni.