Sorkar laipuiin hmarchhak state-te Hmasawnna tur a ngaihtuah - Union Minister

Ministry of Steel hnuaia Public Sector Enterprise (PSU) pahnih MSTC Ltd. leh Rashtriya Ispat Nigam Ltd. (RINL) ṭangkawp chuan April 9, Thawhṭanni tlai khan Aijal Club-ah 'Development of Rural Sector by Enhanced Steel Usage in Infrastructure & Housing’ leh ‘Increasing Agri-Horti Income of North-East’ tih thupui hmangin workshop an buatsaih a; sorkar laipuia Steel minister Chaudhary Birender Singh-a'n a hmanpui. Minister chuan, sorkar laipuiin hmarchhak state-te hmasawnna tur a ngaihtuah thu a sawi.

Chaudhary Birender Singh chuan, sorkar laipuiin India ram hmarchhaka inkalpawhna kawngah hma a sawn theih nan theihtawp a chhuah thu sawiin, "Hmarchhak state-te'n ke an pên theihna turin kawng hrang hranga hmalak a ni a, hmasawnna ruhrel atan nasa takin hmalak a ni. Kar kal ta mai khan North Eastern Council (NEC) scheme-te Union Cabinet-in a pawmpui a, NEC Special Development Project phei chu 90:10 block grant aṭangin 100% grant-a thlak a ni," a ti.

Hmasawnna ruhrel siamna hmanruate tichak lehzual turin steel hmang uar tura kalkhawmte fuihin Steel Minister chuan, "Steel PSU liante hmalakna vangin hmarchhak state-a hmun hla tak takah steel quality ṭha a thleng thei tawh. Mizoramah steel hmanna tihpun theih a ni," a ti a; Mizoram leh hmarchhak state dangte chu steel hman tamna hmun a nih a beisei thu a sawi.

Chaudhary Birender Singh chuan, MSTC-in hmarchhak state tan hian thil tum ṭha tak tak an nei tih sawiin, "Ni tin thlai leh thei tharte India ram state dangte'n an hmuh ve ngei theih nan ṭan an la a, hmarchhak bikah sawhthing leh lakhuihthei online-in an zuar tawh a, aieng thlengin online hmanga zawrh turin ruahmanna a ni," a ti.

Nikum khan online hmanga loneitute thar chhuah lei theihna e-Rakam (e-Rashtriya Kisan Agri Mandi) hawn a nih thu sawiin CB Singh chuan, "Hemi hmang hian loneitute thar chhuah chu hmun danga awmte pawhin an lo hmelhriat dawn a ni. Loneitute leh anmahni dawrtute inkara mi tam tak awm ṭhin chu e-Rakam hian a titlem a, loneitute nasa takin a pui dawn a ni," a ti a; Mizoramin agriculture leh horticulture lamah MSTC hmang ṭangkai se a duh thu a sawi.

Commerce & Industries minister H Rohlua pawhin thu sawiin, hmasawnna ruhrel reng rengah steel-in hmun pawimawh a chang ṭhin tih a sawi a, "Mizoram hi hmarchhak state zingah hmasawn chak pawl a ni a, steel hman ṭangkai theihna Mizoramin a nei tam hle. Mizoram sorkar hnuaia ICT department-in e-procurement system an siam a, hei hian sorkar department thil lei leh hralh a tih awlsam phah hle a ni," a ti.

Workshop hi ni khat awh niin, India ram hmun hrang hranga mi pawimawhte an tel a, Ministry of Steel-a joint secretary Ruchika C Govil chuan, Mizoramin steel hman kawngah tun aia hma a sawn theihnate a sawi.

Workshop zawhah Union Steel Minister hian thuthar thehdarhtute a kâwm a; Vanglaini palai zawhna chhangin, "Tun dinhmunah chuan iron ore leh steel tamna hmunah loh chuan steel industry lian din theih a ni lo. Tunah hian Parliament-a ngaihtuah turin dan thar thehluh a ni tawh a, ṭhutkhawm leh hmasak berah ngaihtuah hman a nih a rinawm. Dan thar hi pass a nih chuan iron ore leh carbon awm lohna hmunah pawh steel industry lian din theihna chance a awm ang," a ti.

Union Minister chuan, project pakhat cheng nuai hnih sênga steel hmanga in sak theihna an neih thu sawiin, "He project hi phaiah chuan 60/40 a ni a, tlang ramah chuan 90/10 a ni. Mizoram sorkar pawhin a ngaihven a nih chuan steel hmanga in sakna project hi an kalpui thei ang," a ti a; steel hmanga in sak chu a tlo bakah, lirnghing lakah a him bik niin a sawi.