UPSC exam-a tling Mizote Sorkarin ṭanpuina sum hlan
Higher & Technical Education (HTE) department chuan nimin khan Secretariat Conference Hall-ah Mizo ṭhalai, UPSC exam-a ti ṭha, Incentive Cash Award dawng thei tura inziak tlingte hnenah Rs. 1,00,000 ṭheuh an sem a; HTE minister R Romawia'n a dawngtu tur mi 11 hnenah a hlan.
HTE Minister chuan, Mizoram sorkara dinhmun pawimawh tak tak chelh tur Mizo IAS officer an tlem ta hle tih sawiin, pawi a tih thu a sawi a, "Hei hian mipui leh sorkar indawrna kawngah harsatna a awm phah thei a ni," a ti. Incentive cash award chuan UPSC exam paltlang tura inbuatsaihna kawngah Mizo ṭhalai tam zawk ṭan la tura a cho chhuah a beisei thu a sawi.
HTE secretary Lalrinliana Fanai, IAS pawhin thu sawiin, "UPSC exam hi intlansiakna a ni a, tlan thlen ringawt a tâwk lo. A thleng hmasa ber nih a ṭul a, chuvangin, tih tak zetna tel lo chuan hlawhtlin a harsa hle a ni," a ti a; Mizo ṭhalai, UPSC exam bei turte chu tumruhna nen theihtawp chhuah turin a fuih.
Incentive cash award hi mi 11 hnenah hlan a ni a; chungte chu - UPSC NDA & Naval Academy exam paltlang mi pali, Combined Defence Services exam paltlang mi pakhat, UPSC Civil Services preliminary exam paltlang mi panga leh main examination paltlang mi pakhatte an ni.
Incentive cash award hi kum 1992 khan UPSC exam-a prelims emaw mains emawa tlingte hnenah Rs. 5,000 pek ṭhin a ni a, kum 2004-ah Rs. 10,000-ah tihpun a nih hnuah, kum 2017 khan Rs. 1,00,000-ah tihsan leh a ni.
Cash award dawng theite chu - Mizo ṭhalai, Mizorama chêng nghet, UPSC exam (prelims & mains)-a inziakte an ni a; coaching an kal a nih chuan, Rs. 20,000 thleng leh hostel-ah an awm a nih chuan mess fee thla ruk chhung Rs. 2,000 an dawng thei bawk.