PWD-a thawkte'n badge dum an bel

Mizoram PWD Engi­neers Welfare Association (MIPEWA) huaihawtin PWD-a thawkte chuan PWD superintending engineer C Lalchhuana chunga April 2, 2018-a Lunglei Ṭhalai Pawl (LṬP)-te thil tih dan an duh lohzia lantir nan nimin khan badge dum belin pisa an kai.

MIPEWA-in badge dum belh tur an tihah hian an member, PWD engineer-te chauh ni loin, PWD-a thawk zawng zawngrte'n badge dum an bel a ni.

MIPEWA hian thu­chhuah an lo siam tawhah, LṬP-in SE C Lalchhuana pisa kai tur danga an lo tih dan chu indiriamna, dam chhunga ser reh thei tawh lo tur insiamsakna a nih thu an tarlang a, "Kan tuarpuiin ná kan tihpui tak zet. LṬP intite chet dan hi a Mizo lo a, Kristiante chêt dan turah kan ngai thei lo," an ti.

MIPEWA chuan, sorkar hmalakna leh hna thawhah duhthusam lo leh felhlel a awm a nih pawhin, hmalak dan phung pangngai a awm reng tih an sawi a, "Chutih laia dan leh thupek kengkawhtute pawh zahder miah lo leh ring tâwk loa uchuak taka an che mai hi kan dem tak meuh a ni," an ti.