KHAWTHLIR

Thisen pe
Sihphir Vengthar Pastor Bial KṬP chuan nimin khan Sihphir Venghlun Kohhran Hall-ah blood donation camp an huaihawt a, KṬP member mipa 30 leh hmeichhia pathumte'n Synod Hospital tan thisen unit 33 an pe.

NEZCC meeting
April 9, Thawhṭanni khan Aijal Club-ah North East Zone Cultural Centre Annual Meeting - Programme Commitee 2018-19 neih a ni a; NEZCC chairman PB Acharya, Nagaland Governor khuallian a ni. Mizoram Governor Lt.Gen. Nirbhay Sharma, Art & Culture minister R Romawia te bakah, Assam, Mizoram, Arunachal Pradesh, Manipur, Tripura, Nagaland, Sikkim leh Meghalaya aṭangin sawm bikte an tel. Discover North East Yatra kalpui dan tur, painting workshop, spring festival leh octave festival leh Umang Festival hman dan turte an sawiho a ni.

Chawki rearing
Lawngtlai district-a Thingkah khuaa Chawki Rearing Centre-a pangang no khawi dan (chawki rearing) zirna, ni sawm awh chu nimin khâr a ni a, a khârna inkhawm chu Lawngtlai DRDA project director R Lalremsanga'n a hmanpui. Chawki rearing training hi April 2-ah ṭan a ni a, ISDP beneficiary mi 10 an tel a ni.

Lehkhabu tlangzarh
Laltanpuia Hnamte-in India ram danpui duangtu leh ram hruaitu hmasa Dr BR Ambedkar chanchin a ziahna lehkhabu chu nimin khan Aizawl Press Club-ah MJA vice president Zonunsanga Khiangte-in a tlangzarh. Lehkhabu hi phek 267-a chhah a ni a, Rs. 140 man a ni.

INC candidate tling
April 20, 2018-a Chakma Autonomous District Council inthlan turah, Fultuli biala Congress party candidate Kali Kumar Tongchongya chu chuhtu awm loin a tling. He bialah hian MNF candidate Sunir Tongchongya chu a nomination paper a dik loa ngaiin returing officer N Chakhai-in hnâwlsak.

CM Relief Fund
Thenzawl Sports Committee chuan miharsa zualte ṭanpuina atan Chief Minister’s Relief Fund-ah Rs. 10,000 an chhung lût.