MZP-in journalist-te thlá an hual

MZP chuan nimin khan an Pisapui conference hall-ah kumin March 8 leh 10-a Bairabi Zophaia Assam police kut tuar Mizo journalist-te thlahualna hun an buatsaih a, tawlhlohpuan an hlân.

Thlahualna inkhawm hi MZP vice president Vanlaltána'n a kaihruai a; MJA vice president Zonunsanga Khiangte chuan thu sawiin, MZP-te'n ramri chungchangah Mizoram sorkar leh mipui muthlu an kaihthawh thu a sawi a, "Sorkar lam aṭangin inbiakna a kal chho mek a, Ministry of Home Affairs Joint Secretary hoa inremna ang tihhlawhtlin a nih chuan Mizoram chan a ṭha zawk dawnin a lang," a ti.

Zonunsanga Khiangte chuan, journalist-te chu khawiah pawh news zawng tur an nih thu sawiin, "Indona hmun leh buaina chhuahna hmunahte an kal a, vanduaina tâwkte pawh an awm ṭhin. Zophaia Mizo journalist kut tawrh dan erawh a dang a, journalist an ni tih hre reng chungin an vua a ni," a ti a; Mizo journalist-te kut tawrhna chu MJA kut tawrhnaa an ngaih thu a sawi.

MZP president L Ram­din­liana Renthlei chuan, ramri chungchangah NGO angin theihtawp an chhuah ṭhin thu a sawi a, "Thisen hialte pawh a chhuak thin. A hlawhtlinna tak tak chu sorkar kut a ni. Kan sorkar hrawn mek leh hrawn tawhte hi an huaisen lo kan ti lo, huaisen lehzual kan mamawh," a ti.

MZP President chuan, MZP dinna chu Zophai hmuna Zofate Chawlhbuk sak ngei a la nih thu sawiin, "Assam sorkar pawhin sak an phal a, mahse, Mizoram tih erawh an phal lo. Hei hi kan duh lo, chawlhbuk saka boruak a daih nghal chuan awmzia a awm dawn lo," a ti a; sorkar inthlahdah deuha an hriat apianga chawlhbûk sakna tur ban an phun tur thu a sawi.

MZP general secretary Lalnun­mawia Pautu kaihhruaina hnuaiah Assam police kut tuar journalist-te hi tawlhlohpuan hlan a ni.